Guardo: Donaire modaog gihapon

CEBU, Philippines – Masaligon si businessman-sportsman Jonathan 'Atan' Guardo nga modaog gihapon si IBF/IBO flyweight champion Nonito Donaire Jr. batok sa Mehikanong si Hugo Cazares alang sa WBA super flyweight title karong Agosto 15 didto sa Hard Rock Hotel and Casino, Las Vegas, Nevada.

Matud pa ni Guardo nga bisan pa man sa pagsaka ni Donaire sa timbang, molampos gihapon kini tungod kay magpabilin ang kapaspas ug ang kusog niini.

Si Donaire katapusang nidaog pinaagi sa usa ka fourth-round TKO batok sa kanhi walay pilde nga si Raul Martinez aron madepensahan ang iyang korona niadtong Abril didto sa Araneta Coliseum.

Matud pa usab ni Guardo, nga bisan pa'g anaa na sa top 10 world's best pound-for-pound fighters si Donaire, daghan pa kini'g ngilngig nga away nga ipakita sa umaabot niining sangka.

Ang Top Rank Inc. ni Bob Arum mipasiugda sa Donaire Jr.-Cazares bout diin laing tulo ka Pinoy boxers ang mopakita'g aksiyon batok sa tagsa-tagsa nila ka kaatbang.

Si Bernabe Concepcion, makigsangka batok ni Steven Luevano alang sa WBO featherweight title.

Mokatkat sab sa ibabaw sa ring si ALA boxer Mark Jason Melligen, kinsa lab-as pa gikan sa iyang kadaugan batok ni Fabian Luque ug si Marvin Tampus. – BANAT NEWS