Berberio kampiyon na sab sa 'Run for Sight' didto sa CDU- Mandaue

CEBU, Philippines - Natuman ang damgo ni Charlie Berberio nga mosakmit sa ikaduhang sunod-sunod niyang titulo human niya gidominaran ang mens open sa Run for Sight Monthly Run diha sa Cebu Doctors University (CDU) sa Mandaue City.

Human siya maghari sa open category sa lumba niadtong Mayo, gipakita sab ni Berberio nga andam niyang depensaan ang iyang kampiyonato dihang gitapos niya ang lumba sa oras nga 36:20.490.

Nagsunod ni Berberio mao si Elmo Clarabal sa iyang oras nga 36:28.190, samtang si Elvin Rey Flores mipwesto sa ikatulong dapit sa oras nga 38:20.850.

Sila si RJ Balbuena (44:29.800) ug si Kristian Cabahug (44:30.140) mipahiluna sab sa ika-upat ug ikalimang pwesto.

Mokumpleto sa top 10 mao sila si Dr.Yong Larrazabal (45:15.380) kinsa mao ang second placer sa miaging buwan, Harem Deiparine (47:29.790), Jojo Canete (49:12.670), Steve Jao (49:27.800) ug si Jofre Nestor (50:60.000)

Sa Womens division, ang kanhi aktres ug singer nga si Donna Cruz Larrazabal maoy nanghawud sa oras nga 57:43.890 gisundan ni Melina Ignacio sa oras nga 1:10:43.090.

Ang mga winners sa binulan nga karera makabaton og puntos nga sumadahon inig tapos sa tuig.Ang runner sa men ug women’s division nga makakuha og dakung puntos maoy ilhong Runner of the Year diin mamahimo silang makadawat og mga ganting appliances karong Disyembre.

Gipahibalo ni Joel Baring kinsa mao ang Technical Director sa lumba nga karong Hulyo 12 mahitabo ang sunod lumba alang sa Run for Sight. - Lemuel P. Maglinte (BANAT NEWS)