Banat ug Freeman maoy number - Juan

CEBU, Philippines - Isip usa ka labing orihinal nga sakop sa The Freeman family sa bag-ong dekada (1980’s) dungan-dungan sa akong kumpare Jerry S. Tundag nga maoy atong Editor-In-Chief, dili nato mahimong kalimtan ang pagpasalamat sa atong malumo og kasingkasing nga publisher nga si Juanito V. Jabat kinsa magsaulog sa iyang adlaw’ng natawhan karong Miyerkules, Hunyo 24. Kanang puntoha mismo maoy tubag sa pangutana diin naggikan ang iyang ngalan. Pista ni San Juan Bautista (St. John The Baptist) ug birthday sab sa atong kaugalingon Juan, ang atong amahan nga maoy number-Juan.

Sa atong Freeman ug Banat News ubos sa Star Publication, “there could only be juan and only the best-juan.”

Kinaiya nato dinhi sa media nga dili gyud mohisgot sa edad kay mao kanay atong kontra. Mas maayo pag nganlan ta’g kawatan basta dili lang nganlan og tiguwang. Tiguwang nya, suwayi di ba makaingon ka bata pa diay. Matud pa bitaw sa tagalog “kalabaw lang ang tumatanda” ug dili taga-media. We in the media hate numbers but we definitely like to play words, sa laktod pagkasulti, mas hinay man tingali ta og mathematics pero mas abtik ta kabahin sa pagtagik og mga pulong.

Abi ninyo mga suking tigbasahan sa Banat News, dili unta ako makasuwat og SPORTSgab kun wala pa motugot si Mr. Jabat ug daku nakong pasalamat nga gihatagan kita’g higayon nga madungog ang atong yanong panahom o komentaryo kalabot sa sports bisan og kini matag Lunes lang mapatik.

Bag-o pa lang akong nahisakop sa Freeman gikan ako sa DYLA ubos sa paggiya sa ato karong Press Secretary Cerge Remonde, kanhi station manager sa DYLA-AM, daan na akong nakabantay nga mahiligon sa garay o rhyme si Mr. Jabat.

Makita nimo sa ulohan sa iyang column nga “Have Bat Will Strike” kay kun imo gyud kanang subayon og maayo ilabi na og hinayon nimo’g basa ang syllables sa Ingles, kini nagpasabot “Jab-bat Will Strike” ug sa binisaya pa, kun kinsa kuno kadtong adunay hapak o ‘bat’ maoy sunod mohapak ilabi na kun maghisgot kita’g softball o baseball nga kinahanglanon gyud ang bat.

Gani gusto nakong sundon ang estelo ni Mr. Jabat sa Binisaya, apan gubot lang ako paghimo sa rhyme kay dili ako makasundog sa iyang estilo tungod kay alang kanako, “there could only be Juan and that is Juanito Jabat. Sorry sir, na-murder nako imong ngalan karong adlawa.

Kadto sab bitaw’ng Iranian nga marathoner nga si Odol Daggan imo man sab gi-murder sa imong column - Run Odol, Run.

Sir, sample lang sa rhyme.

“I salute to my favorite juan, my boss. On his birthday, let’s give him a toss.

Why not? This is a day of showers. We can offer him cakes and flowers.

Lechon may not be necessary but let’s have a party today.

Oh! Johnny, where’s my pizza, drumstick and spaghetti”.

* * *

Human masakmit sa Los Angeles Lakers ang ilang ika-15 nga korona sa NBA, nagbansiwag dayon ang NBA cap ni coach Phil Jackson nga Roman numeral X tugbang sa numero 10 alang sa iyang ika-napulo nga korona isip coach - unom sa Chicago Bulls ug upat sa Lakers. Sa mga sports pages sa internet o bisan sa ubang newspaper, napatik nga si Jackson milabaw na sa rekord ni Red Auerbach, kinsa midaog og siyam ka korona isip coach sa karaang Boston Celtics ug kadtong tanang pulos batok sa Lakers.

Apan kun ang basketball legend nga Sugbuanon nga si Julian Macoy ang pasultihon dili ikatandi si Jackson ni Auerbach ug alang kaniya, si Red gihapon maoy labing maayong coach sa NBA.

Ang iyang argumento mao kini. Si Jackson adunay nagpaluyong mga alipores, aduna siya’y offensive coach, defensive coach ug scouts. Si Auerbach wala.

Ang kanunay’ng makauban ni Auerbach mao ra ang iyang “abano” nga puwerteng daghanang baligya sa Carbon. Ug gani, tungod sa ilang pagtahod kang Auerbach, si Jackson nagpabuhot sab og abano ug nagkanayon “Red was a great guy”.

Wala ako'y katakos makiglantugi kang Macoy. Gawas pa nga usa siya ka NBA walking encyclopedia nga mas labaw pag hinipos nga trivia sa NBA kay kang Homer Sayson. Maayong laki kini sa basketball nga kanhi sakop sa USC Warriors champion team sa late 50’s. Ang iyang iskor, 126 points ra ug dili kadto tibuok duwa kay wala man siya pasudla dayon ug sayo sab siya makatiwas sa fourth quarter. OK ka Bay Julian.

Dili diay nako kalimtan pagpasalamat dinhi sa atong lindog ang kanhi UC player (CCC Executive) nga si Rey Yncierto sa paghatag kanako og t-shirts ug terno nga kalo nga may markang LA Lakers 2009 Western Conference champions.

Si Yncierto, nga kanhi player sab sa PBA, tua na manimuyo sa Oxnard City sa California ug dili kaayo layo sa Los Angeles kauban ang iyang asawa nga si Melba Gonzales-Yncierto ug iyang anak nga si Reynaldo Jr., kinsa bag-o lang migradwar sa Channel Island High School didto sa Oxnard.

* * *

SG Miscellaneous. It was the real Father’s Day yesterday, not the June 15 date that brought some confusions to us -- fathers and husbands. Fathers have to take time out with his family to the malls and restaurants. More power to the great Dads. – BANAT NEWS