CEBU, Philippines – Nakuha sa 3 Stars and a Sun ang katapusang lingkoranan sa finals dihang ilang gipilde ang King Rafael, 96-92 sa semis sa midget division sa Lorega Echavez Youth Council (LEYC) Basketball League 2009 didto sa Lorega Sports Center, ning siyudad.
Sila si Rex Jimenez ug RJ Mella nagkumboya og 35 puntos aron pangulohan ang 3 Stars and a Sun, kinsa maoy nakakuha og katungod sa pakigsangka sa Lomar Shaggy alang sa Finals.
Unang nikiat ang mga magduduwa sa 3 Stars and a Sun diin ilang gibiyaan og 12 puntos ang King Rafael paghuman sa unang kuwarter, 27-15. Apan nisumbalik ang King Rafael sa pagpangulo ni Arthur Silao aron pagkitkit sa labaw ngadto na lang sa dos puntos sa ikaduhang kuwarter 40-42.
Ang three-point shot ni Jimenez ug ang kuwatro puntos ni Jimmy Devivar maoy naghatag og 92-89 nga labaw sa 3 Stars and a
Sun sa nahabiling 1:07 sa duwa.
Nisuway pa og apas ang King Rafael, apan naapikihan na sila sa oras.
Ang duha ka free-throws ni Mella maoy mikandado sa duwa.
Si Jimenez maoy topscorer sa 3 Stars & a Sun pinaagi sa iyang 18 puntos, samtang sila si Mella ug Gonzales miabuno og 17 puntos matag usa sa maong kadaugan.
Ang pilderong King Rafael gipangulohan ni S. Labra, kinsa mipupo og 26 puntos, gisundan nilang Silao ug S. Aliñabon nga
pulos miabuno og 20 puntos.
Puntos Matag Usa
3 Stars & A Sun (96) - R. Gimenez 18, R. Mella 17, J. Gonzales 17, J. Devivar 14, B. Nacional 12
King Rafael (92) - S. Labra 26, A. Silao 20, S. Aliñabon 20, E. Yu 13, A. Yu 9. – BANAT NEWS