Game 5 ra kutob? Lakers andam na pagsakmit sa 2009 NBA title

CEBU, Philippines - Nagpanikad na sila si Kobe Bryant ug ang Los Angeles Lakers aron sakmiton ang laing titulo atol sa Game 5 sa ilang best-of-seven NBA Finals batok sa Orlando Magic nga adto gihapon ipahigayon sa Amway Arena sa Orlando, Florida.

Mahimong adto na magsaulog sa ilang ika-15 nga korona sa NBA ang Lakers didto sa Orlando apan ang Magic mismo malaumon nga makabalik pa ang serye ngadto sa Staples Center, ang balwarte sa Lakers.

Si Dwight Howard namutos nang daan sa iyang bagahe kay matud pa niya ilang dad-on og balik ang serye didto sa Los Angeles alang sa Game 6 ug sa Game 7 kung gikinahanglan.

Gikatakda usab karong adlawa nga malabwan ni Lakers coach Phil Jackson ang legendary coach sa Boston Celtics nga si William “Red” Auerbach kinsa migiya sa Celtics ngadto sa siyam ka sagunson nga korona. Si Jackson nagtinguha karon sa iyang ika-10 nga championship ring.

Aduna siya’y unom ka korona sa Chicago Bulls ug tulo sa Lakers ug kung ilang tiwasan ang Magic karong adlawa, mao kini iyang ika-10 aron labwan si Auerbach nga adunay siyam ka korona.

Si Bryant nagtinguha sab sa iyang ika-upat nga korona sa Lakers apan labing una nga dili niya kauban sa team si Shaquille O’Neal kinsa maoy mitabang kang Bryant pagsakmit og tulo ka kampiyonato sa wala pa kini mobalhin didto sa Miami Heat ug ingon man didto sa Phoenix Suns.

Sa kasamtangan, wala pa modaog og korona sa Lakers si Bryant nga dili niya kaban si O’Neal ug nahitabo kini sa miaging tuig diin gilampaso ang Lakers sa natagak nga Celtics.

Hangtod karong mga panahona, dili mahikatulog maghayang si Magic coach Stan Van Gundy dihang sayop ang iyang hukom nga dili mogamit og foul ang Magic sa nahibiling pipila ka segundos diin naglabaw sila’g tres puntos, 87-84. Kung ila pa untang gi-foul sa inbound ang Lakers, mahimong duha lang ka itsa sa free throw ang mahimo ni Derek Fisher inay tablahon ang duwa pinaagi sa three-pointer aron ihatud ang duwa ngadto sa overtime sa 87-all.

Didto na sa overtime gipanitan ang Magic diin napukan gyud sila sa Lakers, 91-99 ug upat lang ka puntos ang ilang nahimo samtang 12 puntos ang na-iskor sa Lakers sulod sa five-minute overtime.

Bisan sa ilang 1-3 nga biya sa serye, malaumon gihapon si coach Van Gundy nga adunay milagrong mahitabo. Iyang gihimong pananglitan ang bantugang cyclist nga si Greg LeMond kinsa maoy nahimong kampiyon sa 1898 Tour de France pinaagi sa usa ka dakung comeback bid.

Hinuon sa kasaysayan, 29 na ka pagsuway ang pakyas sa usa ka team nga may 1-3 deficit ug suwayan sa Magic nga sila maoy labing unang team sa kasaysayan nga mohimong dakung balitok.

Si Howard nagkanayon “We want to make history. We’ve done a lot of things this year as far as a team and individuals are reaching a lot different goals and breaking records and stuff like that, so why not try and do something else?”

Matod pa usab ni Howard kinsang duha ka sipyat nga free throws maoy hinungdan sa ilang kapildehan sa Game 4, walay bisan usa kanila nga naghunana-huna nga mobangon karong adlawa aron lang magpapilde ug ila gyung dad-on og balik ang duwa didto sa Los Angeles. - Gabby G. Malagar (BANAT NEWS)