Rich Media mipukan sa Arcason sa JBA caging

CEBU, Philippines – Mikulit sa ilang ikaupat nga sunod-sunod nga daog ang Rich Media ni Richard Mercado human ilang gipukan ang Arcason and Son's Construction and Development Corporation, 105-98 sa nagpadayong 14th season of the Jaycees Basketball Association (JBA) didto sa City Sports Club-Cebu gym sa Cebu Business Park.

Ang Rich Media gilubong og 13 puntos, 59-46 sa halftime, apan kalit kining nanginit sa third period ug ilang naangkon ang momentum sa katapusang kuwatro minutos sa duwa.

Anugon kaayo ang 31 puntos nga nahagdaw ni Chito Hernandez diin 21 niini gikan sa first half kay nasugamak ang iyang team nga nagbitbit karon og 1-4 nga baraha.

Si Rodulf Lo maoy nangulo sa Rich Media pinaagi sa iyang 24 puntos. Sila si Dennis Que ug Edmund Odulio nagkumboya og 41 puntos alang sa Rich Media nga nagbitbit og 4-0 nga baraha.

Sa sayo pa, ang Zone 360 mirehistro sa labing una nilang daog sa tulo ka duwa dihang ilang gipakgang ang tulo ka sunod-sunod nga daog sa Uptown Jaycees Foundation pinaagi sa

pag-iskor og 82-77 nga kadaugan.

Ang Zone 360 gipangulohan sa ilang 6-foot-3 center Bryan Lasala, kinsa mihipos og 16 puntos, samtang si Dindo Sausa mao sab ang nangulo sa Uptown Jaycees pinaagi sa pagpabuto og 38 puntos.

Sa laing aksiyon, ang Mandaue Jaycees-B midaog batok sa Mack Mayer Printers sa iskor nga 85-75

Sila si Army Marata ug Ritchie Garcia mikutlo og 21 puntos matag usa aron pangulohan ang Mandaue Jaycees-B nga adunay 3-4 nga baraha.

 Ang Printers gipangulohan ni Elmer Laguna sa iyang 18 puntos, gisundan ni Marlou Monreal nga adunay 15 puntos.

Puntos Matag Usa

Unang duwa:

Rich Media (105) - Lo 24, Que 21, Odulio 20, Estella 15, Razon 13, Bisanes 6, Mercado 4, Flores 2

Arcason (98) - Hernandez 31, Lee 16, So 12, Peña 11, Go 11, Jumawan 6, Sullano 6, Caya 3, Tecson 2

Ikaduhang duwa:

Zone 360 (82) - Lasala 16, Alejandrino 14, Balangauan 11, J. Boniel 11, Go 10, I. Boniel 8, Alcover 7, N. Boniel 3, Loma 2

Uptown Jaycees (77) - Sausa 38, F. Te 15, B. Te 8, Noel 7, Jayme 7, A. Lim 2

Ikatulong duwa:

Mandaue-B (85) - Marata 21, R. Garcia 21, flores 20, Cortes 11, Acebron 6, Cal 2, Balbuena 2, P. Garcia 2

Mack Mayer (75) - Laguna 18, Monreal 15, J. Sulay 13, Dela Calzada 10, K. Sulay 6, Chua 5, Barreto 5, Porras 3 – BANAT NEWS