Surban naghari sa 1st Run and Bike for Freedom

CEBU, Philippines – Gipakita na sab ni Niño Surban ang iyang kahanas dihang iyang gidominar ang premier open division sa mountainbike event sa 1st Run and Bike For Freedom kagahapon didto sa South Road Properties (SRP).

Si Surban, sakop sa DFC Cyclone 1 maoy unang mitadlas sa finish line sa oras nga 22:35.83 aron angkonon ang titulo sa open's category (junior-senior class).

Gisuwayan pa'g hulga si Surban sa iyang mga kaatbang,   apan wala kini niya panumbalinga hangtod nga iyang natugkad ang kalamposan.

Nagsunod ni Surban mao si Randy Carbonera sa oras nga 23:01.63, samtang si Albert Basirgo mipahiluna sa ikatulo sa oras nga 23:20.76.  

Ang teammate ni Surban nga si Earl Vince Cadampong mipahiluna sa ikaupat nga dapit sa oras nga 23:51.21, samtang si Randy Carbonera maoy mikapyot sa ikalima sa oras nga 24:25.23.

Sa masters class event, si Nilo Barbalose maoy nilangkat sa kampiyonato pinaagi sa pagtapos sud sa oras nga 12:32.70, gisundan ni Melencio Java nga mi-oras og 12:24.25 ug Jonas Ponseca nga adunay 12:58.99.

Si Oman Suplig maoy naghari sa executive class sa oras nga 10:31.31, samtang si Wilmar Andrino mipahiluna sa ikaduha sa iyang 10:46.39, gisundan ni Dave Manigo, kinsa mitapos sa ikatulo sa oras nga 10:53.01.

Gidominar sab ni Ramon Espinosa sa veteran's class human niya gitapos ang lumba sud lang sa oras nga 17:15.67.

Miangkon sa sunod nga duha ka dapit mao sila si Jonasis Alicaway (17:18.01) ug Joseph Carcueva (17:42.78).

Sa iyang bahin, gidominar ni Franklin Nolasco sa beginner's category sa oras nga 13:05.08. Mi-okupar sa ikaduha si Bryan Luzano sa iyang 13:15.69, gisundan ni Pepito Fajardo alang sa ikatulo (13:22.87). – BANAT NEWS