Landmasters mibuntog sa Pampanga

CEBU, Philippines – Gihatagan og gibug-aton ang importante nga duwa sa Cebu Landmasters pinaagi sa pagpukan sa walay daog-daog nga Smart-Pampanga Buddies, 74-70 aron hawanan ang ilang dalan paingon sa finals sa Hapee-sponsored Friendship Cup kagabii diha sa Cebu Coliseum.

Posibleng makontra sa Landmasters sa finals mao ang nag-unang Ateneo de Manila University (ADMU) Blue Eagles. Kini kun mapilde ang Hapee-CESAFI Selection ngadto sa Eagles, apan kun ang naulahi modaog, ang finalists ilhon pinaagi sa quotient system.

Nagkagidlay ang Landmasters sa tibuok duwa ug gitugotan nila ang Pampanga pag-abante og siyete puntos, 39-32 sa nanghinapos nga bahin sa second quarter, apan nakahigayon kini pagkitkit sa labaw ngadto sa kuwatro puntos, 34-39 sa halftime.

Human sa break, si Stephen Padilla mitusak og duha ka triples ug usa ka three-point play nga maoy nidagkot sa kainit sa Landmasters, kinsa naalkanse og tres puntos, 55-58 paghuman sa third quarter.

Napatabla sa Landmasters ang duwa, 58-all pinaagi sa basket ni Woodrow Enriquez. Katapusang nakalabaw ang Pampanga sa iskor nga 65-64 human sa free throws ni Chris Baluyot sa nahabiling 3:30 sa duwa. Subling nagtabla ang iskor, 65-all human sa split charities ni Carlos Sayon, sukad niadto ang Landmasters mao na ang nidala sa duwa. Ang free throws ni Marlon Basco sa katapusang 4.2 segundos maoy naghatag og kasiguroan sa kadaugan sa Landmasters.

Puntos Matag Usa

Landmasters (74) - Padilla 16, ababon 12, Enriquez 11, Latonio 11, Basco 7, Mercado 5, Cainglet 3, Abadia 3, Sayon 1, Ursal 1

Pampanga (70) - A. Espiritu 17, Al Espiritu 12, Saguindel 10, Arao 9, Baluyot 7, FGelig 5, Vizcara 3, Taylor 3, Alfad 2, Nicdao 2 – BANAT NEWS