CEBU, Philippines – Mihakot og upat ka titulo ug mga runner-up trophies ang Castrol-Quickflight racing team nga maoy nag-una sa mga mananaog sa 2nd Congressman Ramon ‘Red’ Durano VI Motocross Invitational niadtong Domingo didto sa barangay Mangitngit sa dakbayan sa Danao.
Si Donkey Sanchez maoy nangulo sa kalampusan sa Castrol-Quickflight pinaagi sa pagdominar sa enduro 125 ug open enduro categories.
Si Sanchez gisundan sa iyang teammate nga si Ray Quirol sa enduro 125, samtang si Richard Perminoff nalandig sa ikatulo. Si Kent Louis Canape mi-okupar sa ikaduha sa open enduro, gisundan ni Ayen Ledesma.
Mi-okupar sab sa ikaduhang dapit si Sanchez sunod sa lain niyang teammate Ryan Quirol sa beginners open, samtang si Keith Galaura miangkon sa ikatulong dapit.
Sila si Ryan Quirol, Keith Galaura ug Donkey Sanchez miangkon sa ikaduha, ikatulo ug ikaupat nga dapit sa novice open production nga gidominar ni John Flores. Si Andrew Canlas mikapyot sa ikalima nga dapit.
Ang Castrol-Quickflight nakakuha sab og titulo kortesiya ni Jun Enriquez sa executive A human gipilde silang Aloy Igot ug Seigfred Ornopia.
Hinuon, si Ornopia sa Keiz BJ Racing Team mipukan ni Enriquez aron langkaton ang titulo sa executive B, samtang si Igot nalandig sa ikatulo.
Laing rider sa Castrol-Quickflight nga si Joel Andrin mihakot og runner-up finish sa executive C nga nadaog ni Felipe Montejo, samtang ang teammate nga si Clark Wagas mitapos sa ikatulo sa intermediate class nga giharian ni Jubenile Abellar sa PSR-Motofix, gisundan ni Weng Yapparcon.
Sa iyang bahin, si Jon-Jon Adlawan, naghari sa expert class batok nilang Paolo Inoc ug Ambo Yapparcon, samtang ang ikaupat ug ikalima nga dapit nakuha nilang Abellar ug Wagas.
Ang anak ni Ornopia nga si Earl Jean Brylle, midaog og laing titulo sa peewee open pinaagi sa pagpilde nilang BJ Pepito ug Tomtom Largosa.
Hinuon, si Pepito naghari sa peewee 7-under, gisundan ni Marriane Yapparcon ug Vinz Batula. – BANAT NEWS