All Friends mipukan sa Alelu's Friends

CEBU, Philippines – Naka-ipsot ang All Friends sa kulbahinam nga duwa batok sa Alelu's Friends pinaagi sa paglansang og 103-102 nga kadaugan sa open category sa Riverside Summer Basketball League sa Poblacion Oriental sa Consolacion.

Nagtinuhogay og mga puntos ang duha ka koponan pagsugod nga miresulta sa panagtabla, 78-all paghuman sa third quarter.

Nag-ambo na unta sa ganghaan sa kadaugan ang Alelu's Friends dihang nilabaw sila og dos puntos, 102-100 sa katapusang sayes segundos sa duwa, apan si Elbert Malagar mitusak og triple aron luwason ang All Friends.

Si Louie Malagar mipabuto og makabungog nga 44 puntos aron pangulohan ang All Friends. Laing duha ka Malagar ang mitimbre og double figures diin si Elbert mitimang og 20 puntos ug si Londe mihirit og 17 puntos.

Si Jerome Valle mao sab ang topscorer sa Alelu's Friends pinaagi sa iyang 25 puntos, gisundan ni Leemar Dahil nga adunay 18 puntos.

Ang summer league nga gipasiugdahan ni barangay councilor Paul Alelu Q. Flores uban ni commissioner Baste Alivio, gipaluyohan sab sa Poblacion Oriental barangay council ubos sa liderato ni Brgy. Capt. Melquides Caylan.

Puntos Matag Usa

ALL FRIENDS (103) - Louie Malagar 44, E. Malagar 20, Londe Malagar 17, Mantilla 13, Lar. Malagar 7, Caña 2

ALELU'S FRIENDS (102) - Valle 35, Dahil 29, Reluyan 17, Pepito 13, Tibon 4, Bio 4 – BANAT NEWS