'Chao' Sy mopasiugda'g 4-cock derby sa Talisay

CEBU, Philippines – Usa sa mga inilang sports leader dinhi sa Sugbu nga si Lorenzo 'Chao' Sy mo-promote og 4-cock derby karong adlawa diha sa Talisay Sports Complex.

Ang derby sugdan sa alas-5 sa hapon.

Aron paghatag sa mga entries ug kaangayan, si Sy nagkanayon nga dili siya mosalmot ug dili siya magdala og manok didto sa buwangan aron paglikay sa mga pagduda. Sa kinaiyahan, ang mga promoters mosalmot sab ug magdala’g kaugalingon hiniktang manok aron maoy ilang pustaan. 

Ang pot money alang sa maong derby P5,500 matag entry ug ang prize money sa mahimong kampiyon sa derby karong adlawa mokabat og P500,000 o tunga sa milyon ka pisos.
Mga inilang bigtime cockers sa kinatibuk-ang Visayas lakip na sa Cebu ug Bohol, mosalmot ning maong derby. Gibana-banang 50 ka entries ang mosalmot karong adlawa.

Lakip sa mosalmot mao sila si Lukris Vallente sa Lapu-Lapu City, Edsel Du ug ang iyang igsuon nga si Dr. Du ug si Angel Olario sa Bohol, magsuong Alvin ug Bebot Monsanto, Victor Sierra, Mike Co, Albert 'Boy' Sy, Jason Garces, Engr. Laborada, Boy Macasero, Alvin Lim, Michael Go ug Joe Co.

Si Sy naila sab isip usa ka promoter og boxing sud sa dugay nang panahon ug promoter sa basketball lakip na niini ang National Inter-Collegiate ug ang 6th Asian University Basketball Championships (AUBC) sa miaging tuig. – BANAT NEWS