Lomar Shaggy naka-una batok sa Carolinians sa LEYC caging
CEBU, Philippines – Ang lay-up ni Michael Ledesma sa nahabiling 5.3 segundos sa final period maoy miluwas sa Lomar Shaggy gikan sa mga kamot sa Carolinians, 93-91 sa "best-of-three" semifinals sa midget division sa Lorega Echavez Youth Council (LEYC) basketball tournament diha sa Lorega Sports Complex.
Si Ledesma maoy topscorer sa Lomar Shaggy pinaagi sa iyang 34 puntos. Si Mat-mat Cabrera miamot og 12 puntos, samtang si Jerome Ingente mitampo og 10 puntos alang sa Lomar Shaggy, kinsa mi-abante sa serye, 1-0 ug nagkinahanglan na lang og usa ka daog aron mo-abante ngadto sa finals.
Ang pilderong Carolinians gipangulohan ni Sven Deo, kinsa miposte og 30 puntos, gisundan ni Vincent Dumasig nga midiga og 15 puntos.
Init ang duwa sa duha ka koponan sa tulo ka kuwarter, apan ang Lomar Shaggy maoy nakakuha og tres puntos nga labaw, 64-61 pagtapos sa third period.
May purohan unta nga modaog ang Carolinians dihang nilabaw kini og dos puntos, 91-89 sa nahabiling 24.2 segundos sa duwa, apan si Harold Flores mipasulod sa basket human niya mailog ang bola gikan ni Williams Entera nga nakapatabla sa duwa, 91-all
Misamot ang kalbaryo sa Carolinians dihang mikagar ang libre kaayong 3-point shot ni Floyd Herrera sa nahabiling 10 segundos.
Ang marka bahala nga itsa ni Ledesma sa himalatyong oras maoy nakapahupay sa galamhan sa nagbangutan nga Lomar Shaggy.
Puntos Matag Usa
Lomar Shaggy (93) – M. Ledesma 34, M. Cabrera 12, J. Ingente 10, H. Flores 10, M. Natural 8
Carolinians (91) - S.Deo 30, V. Dumasig 15, W.Entera 14, R.Villanueva 11, F. Herrera 4 – BANAT NEWS
- Latest
- Trending
