Race course sa OZ Racing gipadak-an

CEBU, Philippines – Halapad nga race course ang subayon sa mga partisipante sa pag-arangkada sa 2nd leg sa OZ Racing Grand Prix Series 2009 nga gipaluyohan sa Yamaha Philippines Inc. ugma diha sa Parkmall parking lot sa north reclamation area.

Ang aksiyon masaksihan gikan sa alas-8 sa buntag hangtod sa alas-5 sa hapon.

"We made a slight modification in the racetrack. It’s bigger this time compared to the previous leg," matud pa ni OZ Racing president Zandro Fajardo atol sa press conference kagahapon didto sa Bo’s Coffee sa Parkmall.

Sa dili pa ang race proper, si OZ Racing marketing director Chad Mascariñas nagkanayon nga ang qualifying round ug ingon man ang registration himuon karong adlawa.

Mga kategoriya nga tigian ning lima ka leg nga Underbone Motorcycle Racing mao ang beginners superstock 110, beginners superstock 125, automatic mix open, novice open ug expert open.

Matud pa ni Fajardo nga ilang ilakip sa second leg ang Team Race tungod sa hangyo sa mga riders.

Atol sa lumba, si Fajardo nagkanayon nga mobutang sila og photo exhibit uban sa profile sa nagkalain-laing category champions sa miaging tuig nga series.

Masentro sa maong lumba mao ang showdown tali sa duha ka banggiitang riders sa Sugbu nga si Lyndon Requilme sa Team MAC ug Gary Cañeda Jr. sa Cañeda Racing.

Si Cañeda miharos sa expert open ug novice titles atol sa unang leg, samtang si Requilme maoy naghari sa automatic mix ug ikaduha sa novice class.

Atol usab sa maong lumba, adunay ipanghatag nga freebies ngadto sa mga dumuduong, sumala pa ni Norkis development officer Scout C. Tumulak.

Sa iyang bahin, si Yamaha-Cebu branch head Carlo Monterola miingon nga mosuporta sila sa maong kalihukan kay mao kini ang ilang oportunidad nga mapakita nila ang Yamaha motorcycles. – BANAT NEWS