Sa Cebu Coliseum, Tulo ka WBO title ilogan karong gabii

CEBU, Philippines - Laing kasaysayan sa boksing dinhi sa  Sugbu ang mapatik karong adlawa dihang tulo ka World Boxing Organization (WBO) regional title fights ang mahitabo diha sa Cebu Coliseum.

Sugdan ang binukbukay sa alas-5 sa hapon.

Sila si Ramie Laput ug Johnreil Casimiro andam na nga modepensa sa ilang korona batok sa mga mangtas nga challengers, samtang si Marvin ‘Marvelous’ Sonsona mosuway pagsakmit sa WBO championship sa regional level.

Si Laput (37-3, 20KOs) mosugal sa iyang WBO Inter-Continental junior featherweight title batok ni kanhi world champion Ratanachai Sor Vorapin (74-11, 49KOs) sa Thailand, samtang si Casimiro modepensa sa iyang WBO Asia-Pacific light flyweight crown batok ni Arden Diale sa Dante Almario Stable.

 Sa iyang bahin, ang knock-out artist nga si Sonsona (12-0, 11KOs), mosuway pag-ilog sa WBO Oriental flyweight title gikan sa mga kamot ni Thai champion Wandee Singwancha.

Mopakita usab og aksiyon si Anthony ‘Rocky’ Marcial (14-0, 13KOs) kontra ni Jack de Asis, samtang si ex-WBO Asia-Pacific champion Jason Egera makigbinukbukay usab batok ni Pramunsak Phosuwan.

Laing pito ka away ang mokompleto sa undercard sa boxing event nga gipasiugdahan sa SGG Sports Promotions ni Sammy 'Don King' Gello-ani ug sa Kokiet Boxing Group sa Thailand uban sa abag sa American Boxing Academy sa Digos, Davao del Sur ug Omega Boxing Gym.

Ang tiket nagkantidad og P50 alang sa general admission, P100 sa upperbox, P200 sa lower box ug P500 alang sa ringside. - BANAT NEWS