Pacquiao dili madayon pagbisita dinhi sa Sugbu

CEBU, Philippines – Dili na gyud mo-anhi sa Sugbu si pound-for-pound king Manny Pacquiao human mag-usab-usab ang petsa sa iyang pagbisita dinhi.

Si topnotch Cebuano promoter Rex 'Wakee' Salud, suod nga higala ni Pacquiao, mikompirma kagahapon sa Banat News nga dili mahinayon si Pacman sa iyang pagbiyahi dinhi sa Sugbu nga gitakda unta karong adlawa gumikan kay aduna pa kini laing mahinungdanong mga butang nga iyang atimanon.

Sa nahaunang mga taho, si Cebu City Vice Mayor Michael L. Rama mipadayag nga si Pacquiao mobisita dinhi sa Sugbu niadtong Mayo 18 o dili ba Mayo 22.

Gumikan niini, ang kagamhanan sa dakbayan nag-andam og engrandeng welcome party alang ni five-division world champion agi'g pagtamod sa makabungog niyang kadaugan pinaagi sa second round knockout ni British superstar Ricky 'Hitman' Hatton niadtong Mayo 3 didto sa MGM Grand Garden Arena sa Las Vegas, Nevada.

Apan gisibog kini ngadto sa Mayo 25 hangtod nga gi-uswag na usab kini karong adlawa Mayo 27 kay lagi aron si Mayor Tomas R. Osmeña, kinsa bag-o lang nahiabot sa Sugbu gikan sa malampuson nga operasyon sa Amerika, personal nga makasugat ni Pacquiao.

Apan dili na kini mahitabo.

"Nanghinaut si Pacquiao nga masabtan siya sa mga Sugbuanon nga dili pa siya makabisita dinhi karong panahona kay grabe gyud ka-busy ang iyang schedule.

"Mipasalig hinuon siya nga mo-anhi dinhi by the end of June," matud pa ni Salud.

Si konsehal Sylvan 'Jack' Jakosalem, ang tsirman sa committee on games, amusements and professional sports sa konseho, na-anognan sa higayon, apan nagkanayon nga nakasabot sila sa sitwasyon ni Pacman.

Nagkanayon si Salud nga si Pacquiao bag-o pang miabot gikan sa Thailand ug mopauli kini sa General Santos City karong adlawa.

Karong Hunyo 1, si Pacquiao kauban sa iyang pamilya molarga sa Australia alang sa 10 ka adlaw nga bakasyon. Human niini, molarga dayon siya sa New York aron dawaton ang pasidungog isip "Fighter of the Year" sa 84th Boxing Writers Association of America (BWAA) Annual Awards karong Hulyo 12 didto sa The Capitale nga nahimutang sa 130 Bowery sa New York City.

Samtang atua sa Amerika, gibutyag ni Salud nga si Pacquiao magsugod sab og negosasyon alang sa posibleng away batok ni world welterweight champion Miguel Anguel Cotto sa Puerto Rico karong Oktubre 17. – BANAT NEWS