Conde misakmit na gyud korona sa expert class

CEBU, Philippines – Sa katapusan, nasakmit na gyud ni Ted Conde ang labing una niyang titulo sa expert division pinaagi sa paghari sa 9th leg sa 2009 MS Motosuit Motocross Series nga giulohan og 4th Hudyaka Zanorte Castrol Motocross niadong Domingo didto sa Dipolog City sa Zamboanga del Sur.

Ang garbo sa Ozamiz City mipukan nilang Kimboy Pineda ug Ambo Yapparcon nga nalandig sa ikaduha ug ikatulo nga dapit.

Si Jetjet Oliveros mi-okupar sa ikaupat nga dapit, samtang si Irwin Uypitching napunta sa ikalima nga dapit.

Hinuon si Pineda nakadala og titulo pinaagi sa pagpukan ni Conde sa intermediate open class.

Ang 2008 Rider of the Year nga si Seigfred Ornopia naghari na sab sa Executive-A division. Si Ricardo ‘Nonoy’ Reluya nalandig sa ikatulo, apan nakabawi kini sa Executive-B, samtang si Jun Enriquez nakakuha og duha ka runners-up trophies sa Executive-A ug B.

Si Donkey Sanchez nanghawod sab sa local enduro. Apan nalabay siya sa ikalima sa enduro open nga nadaog ni Salmex Longakit.

Sa laing bahin, si Earl Olario, mao sab ang naghari sa novice production, gisundan nilang Clark Wagas ug Paulo Inoc.

Miangkon sa korona sa Executive-C mao si Nonoy Galez, gisundan nilang Jokjok Bustilino ug Noel Gomez.

Ang top three sa beginners open mao sila si Jason Bayawa, Adam Uypitching ug Tadoy Mercado.

Sa peewee division, ang anak ni Ornopia nga si Earl Jean Brylle maoy nidominar sa peewee division.

 Ang mga   manghod ni Brylle nga sila si Ken Kerry ug Kerry Keizer nalandig sa ikatulo ug ikaupat nga dapit. – BANAT NEWS