Kobe nagmangtas sa game 3

CEBU, Philippines - Miburak og 41 puntos si Kobe Bryant lakip ang usa ka krusyal nga three-pointer sa kataposang 1:09 sa fourth quarter aron baswaton ang Los Angeles Lakers ngadto sa 103-97 nga kadaugan kagahapon batok sa host Denver Nuggets atol sa Game 3 sa ilang best-of-seven series sa Western Conference Finals didto sa Pepsi Center sa Denver, Colorado.

Gawas sa iyang triple nga maoy nakahatag og 96-95 nga labaw sa Lakers, naka-iskor sab si Bryant ug sagunson nga upat ka free throws sa kataposang 22 segundos ug usa ka interception ni Trevor Ariza maoy miduyog sab sa maong buynas human niya iloga ang hinay nga lob pass gikan ni Anthony Carter sa Denver sa daginotong oras sa duwa.

“It was kind of funny, it was pretty much the same thing, different players. But we got the steal. We got a win, that’s the most important thing,” matod pa ni Ariza.

Daku sab kaayong natabang si Pau Gasol alang sa Lakers tungod kay mihakot man siya og 20 puntos ug milangkat og 11 ka rebounds samtang si Ariza mihipos og 16 puntos alang sa Lakers kinsa aduna nay 2-1 nga bentaha. Ang Game 4 adto gihapon ipahigayon sa Denver unya sa Martes diin kinahanglan sa Nuggets nga makatabla kay mahimutang sila sa peligro kung magtangag og 3-1 nga abante ang Lakers inigtapon sa Game 5 balik sa Los Angeles, California.

Mao kadto’y ikaduhang higayon sulod sa usa ka series nga mi-iskor og 40 puntos si Bryant human sab sa ilang 105-103 nga kadaugan sa Game 1 didto sa Staples Center.

Ang Denver kinsa naglabaw sa halftime, 52-48, mitapos sa third period pinaagi sa ilang 79-71 nga abante ug padayon silang nakigtigi batok sa Lakers ug maoy naglabaw sa kataposang usa ka minuto ug 30 segundos human sa basket ni JR Smith apan gitubag kini dayon ni Bryant ug three-point shot aron pagsakmit sa labaw, 96-95.

Wala na sab kaayo kahuygo sila si Carmelo Anthony ug Kenyon Martin tungod sa foul trouble ug na-fouled gyud sa kadugayan silang duha. Si Anthony maoy nangu sa Nuggets pinaagi sa iyang 21 puntos, lima ka rebounds ug tulo ka assists samtang si Chauncey Billups midugang og 18 puntos ug gikan sa bench, mi-iskor ug 15 puntos si Chris Andersen.

Si Nene Hilario milansang og 13 puntos ug parehong may 10 puntos sila si Dhantay Jones ug Smith alang sa Nuggets.

Kataposang miskit ang Denver human sa duha ka free throws ni Billups, 97-99, may 24.6 pa ang nahibiling oras ug human mobawos si Bryant og duha ka free throws, nakuha nila ang defensive rebound.

Ang Nuggets nakahimo’g 31 ka personal fouls kung itandi sa Lakers nga may 24 lang ka personal fouls. – BANAT NEWS