CBM Swim Club mihipos laing titulo

CEBU, Philippines – Mihipos sa ilang ikaduhang kampiyonato ang Cebu Blue Marlins (CBM) Swim Club dihang ilang gidominar ang Dumaguete City leg sa 2009 G-League Swim Meet Series didto sa Lorenzo Teves Memorial Aqua Center.

Ang CBM mikolekta sa kinatibuk-ang 3,199 puntos, gisundan ni Negros Oriental Blue Dolphins nga adunay 2,401.

Sama sa Cebu leg, ang kalampusan sa CBM gilamasan og daghang most outstanding swimmer awards.

Sila si Rian Raphael Tapang ug Kristina Angelika Torres maoy best swimmers sa 7-under class, samtang sila si Renan Gabriel Tapang ug Karen Mae Indaya maoy nanghawod sa 8-under ug 9-under brackets.

Sila si Lyh Ann Navarro ug Michael Ichiro Kong naghari sa 10-under category, samtang ang igsuon ni Lyh Ann nga si Anthony Linn nidominar sa 11-under category. Si Nicolas James Chiong ug Ana Daniela Paraiso naghari sa 13-under bracket.

Sila si Paula Abigail Vega ug Noel Cañeda miposte sab og sunod-sunod nga MOA awards sa 17-above category.

Sila si Noel Cañeda ug Michael Ichiro Kong sa CBM mihakot og taglima ka bulawan, si Karen Indaya mikabkab sab og lima ka bulawan ug usa ka silver, si Lyh Ann Navarro mikubkob og upat ka golds ug usa ka silver, samtang si Anthony Linn Navarro mihakot og tulo ka bulawan.

Si Paula Abigail Vega mihipos og duha ka golds ug ang iyang igsuon nga si Michael David mihakot sab og duha ka golds ug usa ka silver. Si Jerose Rosada miugkat og duha ka bulawan ug usa ka bronze, si Romylyn Nina Ignacio mipupo og duha ka golds, usa ka silver ug usa sab ka bronze, samtang sila si Chargen Bautista, Pierre Nino Baguio, Patricia Mae Baguio ug Joyce Huguete parehong mihakot og 1-1-1 medal tally.

Si Danielle Mae Ballesteros mitunol og usa ka gold ug usa ka silver, si Fritz Tamara adunay usa ka gold ug usa ka bronze, samtang sila si Kaitlin Capacio ug Nicolas James Chiong adunay usa ka gold ug ingon man usa ka gold sa boys relay.

Lain pang swimmers nga mitunol og medalya sa CBM mao sila si Danielle Angela Biscocho ug iyang igsuong si Serge Patrick, Christine Indaya, Merlyn Silva ug Christopher Paulo Soza.

Mao kini ang ikatulong sunod-sunod nga kadaugan sa CBM ni coach Rolando Alvarez ning tuiga. Ang una niadtong Osky Mabilog Cup. – BANAT NEWS