Managsuong Siso nanghawod sa 14th Gullas Cup

CEBU, Philippines – Misakiyo og tagduha ka korona ang managsuong Sallymae ug Niño Siso sa 14th Gullas Cup tennis tournament niadtong miaging adlaw didto sa Cebu Country Club.

Gisirohan ni Sallymae si Cindy Gerapusco, 6-0, 6-0 aron pagsakmit sa titulo sa girl's 16-under division. Nakuha ni Sallymae ang ikaduhang titulo human gipilde ang iyang igsuon nga si Sallydine, 6-0, 6-2 sa 18-under category.

Gawas niini, nagmaya sab si Sallymae kay iya man naangkon ang P10,000 nga balor sa Balobat racquet nga maoy iyang ganti isip most outstanding player.

Sama ni Sallymae, si Niño miharos sab sa boy's 16 ug 18-under titles.

Gipukan ni Niño si Franklin Encarnacion sa Dumanjug, 6-1, 6-2 aron paglangkat sa korona sa boy's 18-under division. Gisirohan sab ni Niño si Encarnacion, 6-0, 6-0 sa ilang engkuwentro sa 16-under class.

Lain pang mga Sugbuanon nga milangkat og korona sa Gullas Cup naglakip ni John Godfrey Seno sa Bogo nga mipukan ni Alexi Santos sa Palawan, 6-2, 6-3 sa unisex 10-under class. Si Hardie Montecillo mipukan ni Christopher Encarnacion, 6-3, 6-1 aron pagsakmit sa boy's 12-under title.

Mihakot sab og titulo si Fritz Satera pinaagi sa pagpanghawod sa 14-under uban ang 6-4, 6-1 nga kadaugan batok ni Kurt Gerapusco sa General Santos City.

Nakalingkawas sab si Crissianne Issa Kintanar sud sa tulo ka sets batok ni Alexie Santos sa Palawan, 6-4, 1-6, 6-3 aron pagdominar sa girl's 12-under finals. – BANAT NEWS