400 runners modagan sa 4th Arthro Trail Run

CEBU, Philippines – Pormal nga gilusad ang 4th Arthro Cebu Mountain Trail Run kagahapon didto sa Robinson's Plaza Activity Center, ning siyudad.

Dul-an sa 400 runners ang gipaabot nga mosalmot sa tinuig nga lumba nga himuon karong Mayo 31 diha sa barangay Kalunasan, ning siyudad.

Ang kompetisyon naglatid sa men ug women’s open category. Pagasalmotan kini sa nagkalain-laing running clubs dinhi sa Sugbu, fun runners, hikers, running enthusiasts gikan sa nagkalain-laing tulonghaan ug mga sakop sa Philippine National Police (PNP).

 Ang road running queen sa Sugbu nga si Leizl Lumindas-Getaruelas nagtinguha og talagsaong grandslam sa women’s division.

Sila si Getaruelas ug Madelyn Carter mosalmot sa maong lumba isip kabahin sa ilang pagpangandam alang sa 23rd Mt. Kinabalu International Climbathon karong Oktubre 24-25 didto sa Kota Kinabalu sa Malaysia.

Ang Milo Marathon champion nga si Mary Grace de los Santos sa Zamboanga City nikompirmar sab sa iyang partisipasyon. Lain pang lig-ong runners nga mosalmot naglakip nilang Sheena Gacayan, Michelle Balbuena ug ABS-CBN TV Patrol Central Visayas news anchor Haide Acuña.

Sa men’s division, si Eugene Delposo mosalmot sab aron sa pagpanalipod sa iyang korona.

Gawas sa mga medalya ug tropeyo, ang kampiyon makadawat og P3,000, ang second placer makaangkon og P2,000, samtang ang third placer mobulsa og P1,000.

Ang fourth hangtod sa 10th placers makadawat og consolation prize nga P200 matag usa ug mga pakite gikan sa race sponsors.

Ang registration fee nagkantidad og P150. Niadtong interesado mahimong magparehistro sa Planet Sports sa Ayala Center Cebu, Casa Ilongga sa Robinson’s Place ug sa Philippine Sports Commission (PSC)-7 office nga nahimutang sa Cebu City Sports Center.

Ang lumba gipaluyohan sa Arthro Food Supplement, Casa Ilongga, Waterfresh, Aguilon Construction and Development Corporation, Ben Café, Tiger Power Max Energy Drink, Robinson’s Place-Cebu, Prycegas, The Freeman ug ang Banat News. – BANAT NEWS