CEBU, Philippines – Sugdan na karong adlawa ang Alaska Power Camp basketball clinic gikan sa alas-9 sa buntag hangtod sa alas-11 sa buntag diha sa Don Bosco Technology Center covered courts sa barangay Punta Princesa, ning siyudad.
Si training camp director Roel Gomez, kinsa mao sab ang head coach sa University of Cebu (UC) Webmasters, nagkanayon nga gilauman nila nga moabot ngadto sa 100 ka partisipante nga nag-edad og sayes ngadto sa 16-anyos ang mosalmot sa duha ka semana nga clinic.
Ang registration nagkantidad og P1,200 libre na ang upper jersey ug usa ka Alaska basketball.
Ang Alaska Power Camp basketball clinic usa ka expansion program sa Alaska Milk Corporation (AMC) sports development program dinhi sa Sugbu.
Ang AMC mopaluyo sab sa 1st Alaska Baseball-Softball Cup karong Hunyo uban sa pakigtambayayong sa Fastball Sportsventure nga gipangulohan ni Jessie Bernad.
Sa miaging katuigan, ang Alaska Power Camp padayon nagdani sa mga kabataan aron mokat-on dili lamang sa football ug basketball, kun dili lakip na usab sa baseball ug softball.
Si Gomez nagkanayon nga iyang himuon ang mga coaches sa UC isip iyang mga assistants atol sa pagpahigayon sa clinic.
Sa iyang bahin, si Alaska Milk Vice President for Marketing Blen M. Fernando nagkanayon nga ang AMC mopaluyo sa grassroots development alang sa mga team sports nga maoy naghatag sa Alaska og kahigayonan sa pagdala sa maong clinic dinhi sa Sugbu.
Sumala pa ni Fernando, ang AMC nagtuo nga ang sports daku kaayo’g papel alang sa mga birtud sa discipline, hard work, team work ug determinasyon ngadto sa kabataan. – BANAT NEWS