CEBU, Philippines – Mipakita og maayong tilimad-on ang San Roque Football Club dihang nidaog kini pagsugod sa men's open division sa 9th Cebu Amateur Football Club (CAFC) National Inter-Club Football Cup kagahapon didto sa University of San Carlos-Technological campus sa Talamban, ning siyudad.
Gisirohan sa San Roque ang Inter-Cebu Football squad, 4-0, kinsa nakaangkon og dungog isip unang koponan nga mihakot og daog sa torneyo ubos sa premiere division.
Hinuon, ang Inter-Cebu, nakabawi sa U17 category pinaagi sa pagpukan sa Blessed John Seminary 4-3.
Didto sa San Roque Parish football field, ang Sacred Heart School-J (SHS-J) mimakmak sa Inter-Cebu, 5-1 sa boys U14 class.
Sa laing duwa sa U14, gisirohan sab sa Canduman ang Blessed John Seminary 6-0, samtang ang Don Bosco Technology Center (DBTC) midaog sab batok sa Pomeroy, 8-0.
Ang DBTC nidaog sab sa ilang unang duwa sa U17 class, batok sa CIC Mandaue, 7-1. – BANAT NEWS