UV, USPF subha'g daog sa Nestea beach volley nat'l finals

CEBU, Philippines – Gipamatuod sa University of the Visayas (UV) ug University of Southern Philippines Foundation (USPF) nga seryoso ang ilang kampanya pagsakmit og titulo human midaog sa una nilang duwa sa Nestea Fit Beach Volley Season 13 National Finals kagahapon didto sa Boracay Island.

Ang tandem nilang Jade Becaldo ug rookie Precioso Bendijo Jr. sa UV nakarekober human masugamak sa first set aron pagpukan nilang Ariel Carumba ug Louijie Tipgos sa University of San Jose-Recoletos (USJ-R) sa kulbahinam nga three-set, 19-21, 23-21, 17-15.

“I was so thankful that the boys recovered from their first set loss against USJ-R, which is also a tough team to beat. They had good teamwork already in the remaining sets,” matud pa ni UV coach Raffy Briones.

Sa laing bahin, bisan sa ilang kapildihan,

ang USJ-R ni Cebu Sports Hall of Famer coach Grace Antigua may purohan pa gihapon nga moabante sa sunod hugna human gipilde ang tandem nilang Eden Canlas ug Erickson Joseph Ramos sa Colegio de San Juan de Letran, 21-17, 21-12.

“We really need to win against the rest of our opponents in order to enter the semifinals,” matud pa ni Antigua.

Sa women’s division, si Erika Camille Verano uban sa iyang bag-ong katimbang nga si Apple Saraum sa USPF yano kaayong mipukan sa paresan nilang Janice Arnaiz ug Jennifer Conde sa University of Mindanao (UM)-Davao, 21-13, 22-20.

Sa laing bahin, ang men’s defending champion Foundation University (FU) nga gimaneho nilang Arnel Amadeo ug Buensuceso Sayson misugod sa pagpanalipod sa ilang korona pinaagi sa pagposte og 21-14, 21-18 nga kadaugan batok nilang Leonel Evan Laraya ug James Christian Lorca sa San Beda College. – BANAT NEWS