Cobras wala kapugngi

CEBU, Philippines – Wala kapugngi ang pagmangtas sa Southwestern University (SWU) pinaagi sa paglubong sa Asian College of Technology (ACT) Cyber Knights, 83-55 sa Game-1 sa ilang “best-of-three” semifinals ug nagkinahanglan na lang og usa ka daog aron moabante sa kampiyonato sa 1st Vice Mayor Rudy Espinosa Cup basketball tournament niadtong Miyerkules didto sa Barba Sports Complex sa dakbayan sa Toledo.

Ang Cobras maoy kampiyon sa CESAFI Partner’s Cup ug bag-o lang usab nakadepensa sa ilang korona sa National Inter-Collegiate basketball tournament didto sa Butuan City sa miaging buwan.

Walay bisan usa gikan sa Cyber Knights nga nakapiog sa nagbahis nga si Eric Zanoria ug ang ubang players sa Cobras pulos nakatampo sa ilang opensa bisan pa

 wala makaduwa si Eliud Poligrates.
Si Zanoria maoy nangulo sa SWU Cobras sa iyang 20 puntos, gisundan ni Rene Pacquiao sa iyang 10 puntos.

Sa Inter-ballclub category,   ang Blanc Blow mipukan sa CCC Staff sa iskor nga 94-90.

Puntos Matag Usa

SWU (83) - Zanoria 20, Pacquiao 10, Jalandoni 9, Litorja 9, Armecin 8, Belande 7, Divinagracia 6, Gallarde 6, Diango 4, Pria 4
ACT (55) - Cadiz 14, Batiancila 14, Valencia 9, Nuñez 8, Aparice 6, Dy 2, Pontemayor 2 – BANAT NEWS