SWU try-out nagpadayon

CEBU, Philippines – Nagpadayon gihapon ang try-out sa Southwestern University (SWU) Cobras ni coach Dodie Miego diha sa Aznar Coliseum.

Tumong sa maong try-out mao ang paghagpat og bag-ong talento nga mopalig-on sa ilang kampanya pagsakmit sa labing unang korona sa Cebu Schools Athletic Foundation Inc. (CESAFI) nga sugdan karong Agosto.

Mao kini ang gibutyag ni SWU athletic director Ryan Aznar.

Ang try-out himuon gikan sa adlaw'ng Lunes hangtod sa Biyernes gikan sa alas-10 sa buntag hangtod sa alas-12 sa udto.

Nasayran, ang Cobras nagkinahanglan karon og players nga maoy ipuli nilang Eric Zanoria ug Richard Gianchand, kinsa wala nay playing years sa

CESAFI. 

Ang SWU andam sab modawat og mga under trainees aron mahimong sakop sa Cobras sa umaabot nga tuig.

Ang molampos sa try-out makaduwa sa CESAFI ug makadawat og free scholarship sa SWU ug ingon man allowance.

Ang Cobras, kinsa maoy kampiyon sa miaging CESAFI Partner’s Cup, milampos sa pagdepensa sa ilang korona sa National Inter-Collegiate basketball tournament didto sa Butuan City niadtong April 20-26.
Matud pa ni Aznar nga daku nilang dungog nga naka-iskor og back-to-back championships sa Inter-Collegiate. – BANAT NEWS