Wilkris daog sa Mabanto
CEBU, Philippines – Mikimada og 24 puntos ug milangkat og unom ka rebounds si Franklin Narf aron pangulohan ang Wilkris alang sa ilang kadaugan batok sa Team Mabanto, 85-78 sa nagpadayong Barangay Sambag I Basketball League didto sa Sambag I covered court, ning siyudad.
Sikit kaayo ang duwa sa duha ka koponan pagsugod sa duwa nga miresulta sa panagtabla, 22-all paghuman sa maong kuwarter.
Sa sunod nga kuwarter gidominar sa Wilkris ang maong duwa ug milabaw kini og uno punto paghuman sa third quarter, 63-62 ug sa mga paningkamot ni Narf ug kaubanan, misaka ang labaw ngadto na sa siyete puntos dayong kapupos sa oras sa duwa.
Gawas ni Narf, laing tulo ka players ang mikulit og double figures alang sa Wilkris. Si R. Abella mipupo og 20 puntos, si R. Mulay miani og 15 ug si V. Cugal miabuno og 10 puntos.
Si team captain Edwin Mabanto maoy nangulo sa Team Mabanto pinaagi sa iyang 26 puntos, gisundan ni P. Sekoy nga adunay 21 puntos.
Puntos Matag Usa
Wilkris (85) - F. Narf 24, R.Abella 20, R. Mulay 15, V.Cugal 10, E. Manoy 9, A. Aming 7
Team Mabanto (78) - E.Mabanto 26, P. Sekoy 21, E. Limang 12, L. Victor 10, D. Zaballa 9 - BANAT NEWS
- Latest
- Trending
