CCC-CSD Builders naluwas sa overtime

CEBU, Philippines – Nagmangtas sila si Sherwin Abobo ug ang beteranong si Franklin Nailon aron baswaton ang CCC-CSD Builders ngadto sa 92-88 nga kadaugan batok sa Ave Maria Sanctuary Park-USJ-R Jaguars sa overtime aron makabaton og bentaha sa ilang semifinal best-of-three series sa 1st Vice Mayor Rudy Espinosa Cup basketball tournament didto sa Barba Sports Complex sa Toledo City.

Si Abobo kinsa bag-o lang mi-gradwar isip sakop sa Cebu Institute of Technology (CIT) Wildcats, maoy nangulo sa Builders ni coach Boboy Cal pinaagi sa iyang 25 puntos. Si Nailon mitampo og 20 puntos, samtang si Jared Kane Abatayo mi-iskor og 18 puntos.

Sila si Abobo ug Nailon gikuha ni team consultant Romy Cal uban nilang Danny de los Santos ug Michael Sereño aron mopalig-on sa puwersa sa Builders.

Ang ubang mga sakop sa team pulos na mga kawani sa Carmen Copper Corporation (CCC) nga nadestino sa Construction Service Department (CSD).

Si Michael Luga maoy topscorer sa Ave Maria nga mi-iskor og 23 puntos, samtang si Luther Justiniani midugang og 17 puntos, gisundan ni Ranulfo sa iyang 10 puntos. 

Sa laing bahin, mag-abot ugma ang Southwestern University (SWU) Cobras ug Asian College of Technology (ACT) Cyber Knights alang sa laing semifinals.

Ang modaog sa crossover semifinals maoy magsangka sa 'best-of-three final series nga gikatakda sugdan sunod semana.

Puntos Matag Usa

CCC-CSD (92) - Abobo 25, Nailon 20, Abatayo 18, Delos santos 11, Jaca 8, Montalbo 6, Ocañada 2, Redulosa 2

Ave Maria (88) - Luga 23, Justiniani 17, Malinao

10, Gabas 9, Ponce 8, Hatahue 5, Senining 5, Antigua 5, Lapiz 4, Latosa 2 – BANAT NEWS