Boston gyud sa game 7

CEBU, Philippines - Mi-abante ngadto sa second round sa Eastern Conference playoffs ang defending champion human makalingkawas batok sa ilang makutas nga engkwentro batok sa Chicago Bulls human sa ilang 109-99 nga kadaugan sa Game 7— ug ning tungora wala nay overtime ug gidominar na sa Celtics ang fourth period kagahapon didto sa TD Banknorth Garden sa Boston, Massachusetts.

Ang Boston maoy mo-host sa second round batok sa Orlando Magic sugod karong Miyerkules.

Ang playoff series tali sa Celtics ug Bulls maoy pinakanindot nga sangka sa first round sa kasaysayan sa NBA tungod kay sulod lang sa unom ka duwa, milanat man kuno ug pito ka overtime.

Human makahimo’g playoff career-high 51 puntos si Ray allen sa miaging adlaw, gisundan usab kini niya og 23 puntos kagahapon aron pangulohan ang Celtics samtang si Paul Pierce midugang og 20 puntos.

Apan usa sa labing daku og natabang mao si Rajon Rondo kinsa nakahimo’g 16 ka assists ug ingon man usab sa pag-abang nilang Eddie House kinsa mi-iskor ug 16 puntos ug 5 out of 5 sa field goals ug si Kendrick Perkins kinsa mi-iskor og 13 puntos.

Hipanglantawan nang daan ni coach Doc Rivers sa Celtics nga magsagubang og kalisdanan ang ilang playoff batok sa Orlando. “I don’t see great. I just see hard,” matud pa niya. “For a coach, it’s just: Win the series.”, padayon ni Rivers.

Ang Celtics naglantaw og otso puntos sa kataposang 2:30 sa fourth period, 96-88 ug padayon nilang giprotektahan ang maong labaw sa kataposang 37 segundos sa iksor, 105-97.

Si Ben Gordon maoy nangu sa Bulls sa iyang 33 puntos ug si Derrick Rose, ang Rookie of the Year sa NBA, midugang og 18 puntos samtang si Joakim Noah may 15 ka rebounds alang sa Bulls nga naghatag og labad sa ulo ngadto sa defending champion nga wala si Kevin Garnett.

Karong adlawa, magtiwas ang Atlanta Hawks ug ang Miami Heat didto sa Philips Center sa Atlanta, Georgia ug sugdan ang Game 1 sa second round sa West playoffs tali sa no. 2 nga Denver Nuggets ug no. 6 nga Dallas Mavericks.

Ang Nuggets maoy mipalagpot sa New Orleans Hornets sulod lang sa lima ka duwa samtang ang Dallas maoy mitagak sa kanhi two-time champion San Antonio Spurs sulod sa unom ka duwa. – BANAT NEWS