Cobras abante semis sa Toledo caging

CEBU, Philippines – Si Alfred Belande milansang og 26 puntos aron pangulohan ang Southwestern University (SWU) Cobras, kinsa mipalagpot sa AC Sports, 83-80 sa 1st Vice Mayor Rudy Espinosa Cup niadtong Biyernes didto sa Barba Sports Complex sa Toledo City.

Human mo-withdraw ang C&B Shipping, ang Cobras mao na karon ang nag-una sa Group- B sa ilang 3-0 nga baraha. Ilang sangkaon ang Asian College of Technology (ACT) Cyber Knights sa Game-1 sa “best-of-three” semifinals nga sugdan karong Miyerkules.

Karong gabii, ang CCC-CSD  Builders ni coach Boboy Cal moharong sa Ave Maria Sanctuary Park/USJ-R Jaguars, kinsa nag-una sa Group-A bitbit ang 3-0 nga baraha. 

Gawas ni Belande, mipakita sab og katakus ang star guard nga si Aard Diango ug Ritchie Jalandoni kinsa parehong mi-iskor og double figures aron luwason ang Cobras sa kulbahinam nga duwa.

Sa tinguha nga maka-abante sa finals, ang AC Sports mikuha sa serbisyo ni M. Lhullier Kwarta Padala player Gerry Cavan. Si Cavan mi-iskor og 18 puntos, apan si Ricky Labjo maoy nangulo sa AC Sports sa iyang 21 puntos. Si Rene Toring mi-iskor og 10 puntos sa maong kapildihan.

Lain pang nakakuha’g double figures alang sa AC Sports mao si Allen Abayata, kinsa nakaduwa sab alang sa Cebu Niños sa 1st Inter-City Cup duha na ka tuig ang milabay pinaagi sa iyang 17 puntos.

Ang Rudy Espinosa Cup gidumala ni Toledo City councilor Jun Borja sa abag ni tournament director Estong Jaranilla ug technical committee chief Edwin Dejacto.

Puntos Matag Usa

SWU (83) - Belande 21, Diango 13, Jalandoni 10, Pacquiao 9, Armecin 7, Pria 7, Poligrates 5, Gallarde 4, Divinagracia 2

AC Sports (80) - Labajo 21, Cavan 18, Abayata 17, Toring 10, Caparas 7, Daculan 5, Espinosa 2  - BANAT NEWS