Alaska Power Camp dad-on dinhi sa Sugbu

CEBU, Philippines – Sa labing unang higayon, dad-on sa Alaska Milk Corporation (AMC) dinhi sa Sugbu ang nabantog nga Alaska Basketball Power Camp nga gikatakda karong Mayo 14-28 diha sa Don Bosco Technology Center (DBTC) covered courts.

Gibutyag ni camp director Roel Gomez nga labing menos 80 ka basketball enthusiasts ang nagpalista aron mosalmot sa training camp.

Apan iyang limitahan ang training camp ngadto lang sa 120 partisipante nga nag-edad gikan sa 6 hangtod sa 16 anyos aron matudloan kini og maayo.

Adunay registration fee nga P1,200 matag partisipante, libre na ang uniporme ug Alaska branded basketball nga maoy gamiton sa training.

Ang Alaska Power Camp taud-taud nang gihimo didto sa Manila ug milungtad og dugay nga panahon. Nipahigayon sab sila sa ubang dapit sa Luzon ug ning tuiga ilang gilusad dinhi sa Sugbu. Ang Sugbu gi-isip nga usa ka dakung merkado sa mga produkto sa Alaska.

Si Blen M. Fernando, ang Vice President for Marketing sa AMC, nagkanayon nga gawas sa basketball, mopasiugda sab sila og football, triathlon ug karting.

Ang Alaska Power Camp unang namugna niadtong tuig 1995.

Matud pa ni Gomez, kinsa kanhi sakop sa Alaska grandslam team sa 1996, nga iyang dapiton sila si coach Tim Cone ug si Alaska Aces team manager Joaquin Trillo. Sila si Cone ug Trillo maoy motunol sa certificates ngadto sa mga partisipante atol unya sa closing ceremonies.

Si Gomez, kinsa mao sab ang coach karon sa University of Cebu (UC) Webmasters nagkanayon nga iyang gamiton iyang mga trainors, coaches sa UC aron uniporme ang ilang sistema sama sa gigamit sa Alaska.

Gawas sa Alaska Basketball Power Camp, mopasiugda sab og 1st Alaska Baseball-Softball Cup karong Hunyo .

Matud pa ni Alaska Marketing Services Manager Jocel de Guzman, ang AMC nagtuo nga ang sports daku kaayo’g papel alang sa pag-umol og disiplina, hardwork, teamwork ug determination ngadto sa kabataan.

Ang paglusad sa Alaska Power Camp-Cebu basketball clinic sa miaging adlaw, gidasonan sab sa pagtapos sa tulo ka semanang 1st Fastball Baseball/Sotball Summer Camp didto sa Aboitiz Sports Field sa North Reclamation Area. –BANAT NEWS