Pinamungajan mo-host sa 6th leg sa MS moto-x

CEBU, Philippines – Ang 6th leg sa 2009 MS Motosuit Motocross Series nga giulohan og “The Cebu Landmasters Inc. Invitational Motocross” mosikad karon didto sa lungsod sa Pinamungahan sa habagatang bahin sa lalawigan sa Sugbu.

Si event organizer ug MS Motosuit top honcho Lou Ornopia nagkanayon nga ang lumba sa motocross ubos sa iyang pagdumala nag-anam og kadaku ning higayona.

“Buwan pa lang gani sa Mayo, miabot na’g siyam ang na-schedule sa serye, gani human sa Pinamungajan adto na sab ta sa 7th leg sa Ayungon Negros Oriental karong Mayo 10, unya balik dinhi sa Cebu alang sa 8th leg sa San Remigio, Cebu sa Mayo 17 ug 9th leg sa Dipolog City karong Mayo 24,” matud pa ni Ornopia.

Nunot niini, ang nagkalain-laing motocross teams nga mosalmot sa 2009 MS Motosuit Motocross Series ang nangandam na karon alang niining gitakdang mga lumba.

Ang lumba sa Pinamungajan gipaluyohan ni businessman-sportsman Jose R. Soberano uban sa abag ni Mayor Geraldine Yapha. Ang major sponsors sa 1st Cebu Land Masters Inc. Invitational Motocross mao ang San Jose Maria Village-Media Once Toledo, Jela Construction ug Man and Machine.

Ang 6th leg sa 2009 MS Motosuit gipaluyohan sab sa Castrol-Power One, Motosuit Manufacturing ug MS Digital Prints. – BANAT NEWS