MANILA, Philippines - Apat na taon na ang nakakaraan nang makawalong sunod na panalo ang San Miguel Beer.
Mahirap gawin ito at ngayon may pagkakataon ang Beermen na ulitin ito.
Labing-anim na araw ding napahinga sa aksiyon ang San Miguel dahil sa pagdaraos ng liga ng All-Star weekend at nakahadlang sa kanilang inaasam na ikawalong sunod na panalo ay ang Talk N Text na mainit din sa kanilang tatlong sunod na panalo.
May posibilidad na na-ngalawang ang mga teams at napagod ang ilang players na nakibahagi sa mga aktibidades ng All-Stars na idinaos sa Victorias, Negros Occidental at Davao.
Isang malaking hamon ito para sa Beermen, ang league leader sa taglay na 7-0 win loss record na nakatakdang sagupain ang Tropang Texters sa tampok na laro, alas-7:30 ng gabi sa pagpapatuloy ng aksiyon sa Araneta Coliseum.
Ngunit dapat isaalaala ang huling panalo ng Beermen kung saan napahinga din sila ng 17-araw sa pagbibigay daan sa Semana Santa ngunit matagumpay nilang nagapi ang puwersa ng Rain Or Shine, 102-95 noong Abril12.
Kung ginawa ng Beermen ang kanilang asignatura at hindi nagpabaya sa kanilang pagpapakondisyon ay magagawa nilang ulitin ang 8-game winning streak na naitala nila noong 2005 Fiesta conference eliminations.
Mauuna rito sa alas-5:00 ng hapon ay ang sagupaan ng Purefoods (4-4) at Coca-Cola (2-5).
Magbabalik si Marquin Chandler para tulungan ang Purefoods kapalit ni Jamar Thorpe. (Mae Balbuena)