Roble Shipping nakaginhawa pa
CEBU, Philippines – Walay tihik-tihik nga depensa ug nagpungasi nga opensa ang gipatuman sa Roble Shipping ni George Uy nga maoy nakapalubong sa
Unilink Shipping, 99-77 aron pagpuwersa ngadto sa rubbermatch sa ilang best-of-three finals sa Sunrisers/Powerball Friendship Cup basketball tournament didto sa CEC gym.Gikan sa luya nga pagsugod, ang Roble Shipping
hinay-hinay nga nakabaton og kainit ug nakamaneho kini pagposte og 15 puntos nga labaw, 51-36 sa pagpangulo sa ilang point guard Teyoy Lim ug forward Ruel Sestoso, kinsa mipupo og 25 ug 20 puntos matag usa. Ang hugot nga depensa nilang John Carpio ug Gary Maquelan daku sab og natabang alang sa maong kadaugan.
Ang Roble Shipping miinat sa ilang labaw ngadto sa 40 puntos, 70-50 paingon na sa final period.
Sila si Charlie Abellon, Jessie Gabatan, Carpio ug Maquelan pulos sab mi-iskor og double figures alang sa Roble Shipping.
Si Louie Navarro maoy nangulo sa Unilink sa iyang 21 puntos, gisundan ni Panis Gerali pinaagi sa iyang 18 puntos.
PUNTOS MATAG USA
Roble Shipping (99) - Lim 25, Sestoso 20, Abellon 12, Maquelan 11, Gabatan 10, Carpio 10, Uy 6, Aberia 5
Unilink Shipping (77) - Navarro 21, Gerali 18, Bacaly 11, Tabasa 9, Seno 6, Kwan 6, Petallar 4, Quiñanola 2 - BANAT NEWS
- Latest
- Trending
