Cebuana naka-gold sa Palaro '09

CEBU, Philippines – Bisan pa og menos ang performance sa Sugbuanang si Gia Bucag itandi sa CVIRAA Meet nakahimo gihapon kini pagdaog sa unang bulawan sa 2009 Palarong Pambansa didto sa Leyte Sports Development Center sa Tacloban City.

Ang 11-anyos nga si Bucag sa Nangka Elemenary School sa Balamban midaog sa elementary girls javelin throw sa usa ka semanang kompetisyon sa gilay-on nga 35.54 metros. Sa CVIRAA Meet, si Bucag niposte og 36-metros sa maong event.

“Sa akong paglabay ganina, ako gyud gihuna-huna nga maka gold ko. Ganahan gyud ko makadaug,” matud pa ni Bucag.

Si Elisha Mae Cabuguason sa Western Visayas miangkon sa silver sa iyang 34.07 metros, samtang si Caren Magay sa National Capital Region midaog sa bronze sa iyang 33.01metros.

Laing duha nga nikabkab og bulawan mao sila si Nino Espinosa sa Region VI sa secondary long jump sa gilay-on nga 6.63 metros ug si Stephanie Cimatu sa Region I sa secondary girls javelin throws sa gilay-on nga 36.64 metros.

Nidaog sab sa ilang unang duwa ang lawn tennis ug badminton squad sa CVIRAA.

Ang CVIRAA squad nga gipangulohan ni Niño Siso miposte og 2-0 nga kadaugan batok sa CABRAA. Samtang ang badminton squad sa CVIRAA midaog sab batok sa CARAGA.

Si Ralph Bonsukan mipukan ni John Rubi, 21-18, 21-11, samtang ang tandem nilang Ethan Sumpiton ug Dexter Opulla mibuntog nilang Nicole Curilan ug Joshua Sagradao, 21-15, 21-4.

Didto sa University of the Philippines (UP)-Tacloban, ang CVIRAA nga gitimonan sa mga atleta sa Cebu Province miposte og 1-1 win-loss record. Nidaog sila sa elementary level batok sa CAR, 5-0, apan napilde sa secondary division ngadto sa Zamboanga 1-2.

Sa laing bahin, ang opening salvo gitambongan ni President Gloria Macapagal-Arroyo. Nakigduyog niya si DepEd Secretary Jesli Lapuz ug Governor Jericho Petilla sa host Leyte Province ug uban pang mga inilang personalidad. - Gikan sa report ni Caecent No-ot (BANAT NEWS)