CCC-CSD miposte ikaduhang daog sa Rudy Espinosa Cup

CEBU, Philippines - Milansang sa ilang ikaduhang sunod-sunod nga daog ang CCC-CSD Builders human ilang gipukan ang A&C Sports, 91-81 sa nagpadayong 1st Vice Mayor Rudy Espinosa Cup didto sa Barba Sports Center sa dakbayan sa Toledo.

Sa ilang unang duwa, ang Builders midaog sab batok sa C&B Shipping. Ang Builders temporaryo karong nag-una sa Group-B sa ilang 2-0 nga baraha.

Ang beteranong si Jerry Jaca ug kanhi produkto sa CIT Wildcats, maoy topscorer sa Builders ni coach Boboy Cal pinaagi sa iyang 28 puntos. Nakakuha sab kini og suporta gikan nilang Aldrin Ocañada, Jared Kane Abatayo ug Wilbert Sayson nga pulos mirehistro og double  figures.

Sa ilang 2-0 nga baraha, ang Builders segurado na nga makakuha'g luna sa semifinals, bisan pa og mapilde kini sa ilang duwa batok sa Southwestern University (SWU) Cobras.

Si Ricky Labajo maoy nangulo sa A&C Sports nga mibugha og 32 puntos, samtang ang laing kanhi Wildcats nga si Leo Dale Caparas misungkab og 10 puntos.

Sa preliminary game, ang CSD Power Builders naka-ipsot sab batok sa TSBA quintet nga nagbasi sa dakbayan sa Toledo sa iskor nga 86-85.

Puntos Matag Usa

CCC-CSD (91) - Jaca 28, Ocañada 16, Abatayo 11, Sayson 10, Abobo 9, Nailon 8, De los Santos 4, Arnado 3, Montalbo 2

A&C Sports (81) - Labajo 32, Caparas 10, Daculan 9, Espinosa 8, Abayata 7, Mariano 6, Belano 6, Tigbas 3. - Gabby G. Malagar