Dul-an sa 150 cowboys magtigi sa 2nd Senator Zubiri Rodeo Finals

CEBU, Philippines – Dul-an sa 150 ka cowboys   lukop nasud ang mopakita sa ilang talento sa rodeo dihang ang 2nd Senator Juan Miguel F. Zubiri Cup National Rodeo Finals mosikad karong adlawa diha sa Mandaue Rodeo Arena nga nahimutang sa Parkmall sa Mandaue reclamation area.

Sa dili pa sugdan ang kompetisyon, adunay ipahigayon nga opening ceremony pinaagi sa parada diha sa Mandaue City Sports and Cultural Complex.

Gilaumang motambong sa maong kalihukan mao si Senator Juan Miguel F. Zubiri, Cebu Provincial Governor Gwendolyn ‘Gwen’ Garcia ug si Mandaue City Mayor Jonas Cortes.

Gawas nga mohatag sa iyang mensahe, si Zubiri pormal sab nga mopanumpa sa mga opisyales sa organizing Filipinas Rodeo Federation Inc. (FRFI) nga gipangulohan sa ilang presidente nga si Maryo T. Okinlay.

Ang ubang mga opisyales sa FRFI mao sila si Noel Basubas (vice president), Anton Quisumbing (secretary), Mayor Bernard ‘Butch’ Sepulveda (treasurer). Ang Board of Directors mao sila si Neal de la Cerna, Jose Miguel S. Fortich ug Michael Siao.

Dul-an sa tunga sa milyon ang ganti ang giandam alang sa mga mananaog ning duha ka adlaw nga kompetisyon nga gipaluyohan sab sa League of Cebu Municipal Mayors-Cebu Chapter ug Del Monte Philippines. – BANAT NEWS