Andam na sab ang 2nd Mandaue City Mayor's Cup Run

CEBU, Philippines – Gibana-banang moabot ngadto sa 500 ka runners ang mosalmot sa 2nd Mandaue City Mayor's Cup Run karong Mayo 3 diha sa Cebu International Convention Center (CICC) sa Mandaue reclamation area.

Ang lumba nga sugdan sa alas-6 sa buntag gibuak ngadto sa 10K Open (men's and women's), 10K Masters A ug B, 5K Inter-barangay (men's and women's) ug ang 3K non-competition.

Dul-an sa P30,000 nga ganting salapi ang giandam alang sa mga mananaog sa tagsa-tagsa ka mga kategoriya gawas lang sa 3K non-competition division nga gimugna alang sa mga joggers.

Sila si Eugene Delposo ug Leizl Lumindas-Getaruelas gipaabot nga maoy manghawod sa tagsa-tagsa nila ka dibisyon ning maong lumba nga gipasiugdahan sa Mandaue City Sports Commission ubos sa pagdumala ni Atty. Hidelito S. Pascual uban sa abag ni Democrito 'Imok' Branzuela isip chairman.

Niadtong buot mosalmot, ang deadline sa pagpangrehistro hangtod sa Mayo 1 diha sa Mandaue City Hall ground ug sa Cebu City Sports Center. Adunay registration fee nga P150 matag entrante.

Alang sa dugang mga kasayoran, mahimong motawag/text ni Kid Dignos sa   09094371992.  - BANAT NEWS