PRISAA-7 padayong nanghasi sa National Games
CEBU, Philippines – Padayong mipakita og maayong labok ang Central Visayas sa tanang ball games diin
kini mihipos na'g 22 golds, 19 silvers ug 21 bronzes sa medal tally sa 2009 Private Schools Athletic Association (PRISAA) National Games didto sa Naga City.Si Zoe Menguito sa Dumaguete City, ang nidaog isip labing daghang medalya nga nahakot alang sa PRISAA-7 nga mikabkab og tulo ka bulawan ug usa ka silvers sa paghuman sa swimming competition. Si Menguito midaog sa iyang ikatulong bulawan pinaagi sa 50m butterfly event.
Si Menguito mao sab ang migiya sa PRISAA-7 pagdaog og bulawan sa 4x100 medley relay uban nila Meribeth Ababon, Kruzette Solijon ug Gwencent Cañada.
Sa katapusang adlaw sa swimming, ang PRISAA-7 mihakot og walo ka bronze medals gikan sa 4x50m freestyle relay ug 4x100m medley relay.
Naglangkob sa 4x50m relay mao sila si John Solon, Anthony Ong, Noel Cañeda ug Vincent Cañada, samtang sa 4x100 medley mao sila si Solon, Cañeda, John Guno ug Rowan Fernandez.
Matud pa ni assistant coach Franz Baguio, si Venice Aseniero milangkat og silver ug si Gwencent Cañada milaksi sa bronze sa 200m breaststroke.
Sa athletics, ang PRISAA-7 miugkat og unom ka bulawan, duha ka silvers ug upat ka bronzes.
Si Lindley Navaja, nagbahis na sab aron pagkabkab og laing bulawan sa 200m run sa oras nga 21.97 segundos.
Sa dancesport, ang PRISAA-7 nidaog og duha ka golds ug duha sab ka silvers.
Midaog sab og bulawan ang taekwondo sa PRISAA-7 kortesiya ni bantam Richard Caingles uban ang tulo ka silvers ug tulo sab ka bronzes. - BANAT NEWS
- Latest
- Trending
