CEBU, Philippines – Labing menos 60 ka mga langyaw eskrimadors ang miabot na dinhi sa Sugbu aron pagsalmot sa Cacoy Doce Pares World Federation 2009 World Eskrima-Arnis Championships nga sugdan karong adlawa diha sa City Sports Club-Cebu sa Cebu Ayala Business Park .
Ang torneyo sugdan sa alas-2 sa hapon.
Gawas sa mga partisipante gikan sa host Cebu, ang tulo ka adlaw nga kompetisyon gisalmotan sa mga langyaw'ng eskrima ug martial arts champions gikan sa Australia, ang defending champion, Indonesia, New Zealand, Germany, Poland, Spain, Canada, Italy, England ug sa Estados Unidos.
Isip pagdayeg sa ilang pagbisita sa Sugbu nga makatabang og palambo sa atong turismo dinhi sa Queen City of the South, ang kagamhanan sa dakbayan sa Sugbu pinaagi ni acting mayor Michael L. Rama, mipahigayon og welcome party didto sa Fort San Pedro ubos sa pagpangulo ni event organizer Grand Master Ciriaco 'Cacoy' Cañete.
Ang official weigh-in himuon karong adlawa human sa registration. Human niana, adunay pagahimuong seminar alang sa officiating officials aron tukion ang mga lagda sa maong torneyo nga gipaluyohan sab sa Department of Tourism ubos ni Secretary Ace Durano.
Ang paglambo sa eskrima sa nagkalain-laing dapit sa kalibotan maoy usa sa hinungdan kun nganong angayan pagatigomon ang mga hanas sa eskrima aron paghatag kanila'g higayon sa pagpakita sa ilang katakus.
Ang Australian team nga maoy labing daghang entrante, modepensa sa ilang korona. Pangulohan kini ni Grandmaster Vince Palumbo sa International Combative Martial Arts Academy ug Grand Master Christopher Nasilowksi sa Millenium School of Martial Arts. - BANAT NEWS