Cebu Niños, Misamis Oriental magtiwas karong gabii

CEBU, Philippines - Usa ka init ug kulbahinam nga panagsangka ang atangan karon dinha sa Cebu Coliseum dihang mag-abot na ang defending national champion M. Lhuillier Kwarta Padala-Cebu Niños ug ang bisitang Misamis Oriental Meteors aron tiwasun ang ilang init nga panagribal sa deciding match sa ilang best-of-seven finals series alang sa korona sa Smart-Liga Pilipinas Conference II karong alas-6 sa gabii.

Ang Meteors maoy unang nikulit og daog, 70-64, apan nisumbalik ang Niños sa Game 2, 58-55. Ang MisOr ni Governor Oscar Moreno nisakmit sa Game 3, 73-71, samtang gigamit sa Niños ang ilang homecourt advantage sa Game 4 aron bawsan ang Meteors, 62-58 niadtong Sabado aron dad-on ang serye ngadto sa deciding game.

Agi’g pahalipay sa mga Cebuanos, ang Smart Communications ug PLDT ni businessman-sportsman Manny V. Pangilinan, miabli sa general admission og upper box nga lingkuranan nga libre ngadto sa publiko.

Human sa nindot nga labuk nga iyang gipakita sa Game 4, ang tirador nga si Bruce Dacia mao karon ang giatangan nga mangulo sa Cebu, gawas ni Dacia, moabag usab kaniya sila si Abby Santos, Stephen Padilla, Woodrow Enriquez, Marlon Basco ug Mark Ababon aron makuha sa ilang koponan ang ikaduha nilang korona.

Mokumpleto sa line-up sa Niños ni Michel J. Lhuillier ug legendary coach Raul “Yayoy” D. Alcoseba mao sila si Gerry Cavan, Jercules Tangkay, Danny Aying, Ariel Mepaña, Rino Berame, ug Mike Dizon.

Sa ilang bahin ang Meteors, magsalig sa ilang team leader nga si Mark Yee, kinsa mao ang Conference MVP. Ang 6-foot-2 forward gikan sa San Sebastian-Cavite nilangkat sa korona nga nag-average og 14.4 points, 10.5 rebounds, 1.1 blocks sa 28 ka duwa.

Uban ni Yee nga moburak alang sa MisOr mao sila si Ramil Tagupa, Erian Daja, Mark Kong, Dexter Micutuan, Joey Mente, Mark Moreño, Jeff Bombeo, ug Lyndon Gudez. - Lemuel P. Maglinte (BANAT NEWS)