Kongresista PJ Garcia cup gibuksan sa dakbayan sa Toledo

CEBU, Philippines - Gitigum ni Kongresista Pablo John “PJ” Garcia ang tanang mga barangay kapitan ubos sa iyang balwarte apan dili pinaagi sa usa ka tigum politikanhon kung dili pagduwa og basketball.
Gidapit ni Kongresista Garcia ang tanang mga kapitan ug ang tanang mayor sa unom ka lungsod ug usa ka dakbayan mianong sa iyang hangyo nga mosalmot sa torneyo nga iyang gipasiugdahan nga mao ang 3rd Congressional Inter-Barangay Captains Basketball Tournament 1st Congressman PJ Cup didto sa bag-ong natapos nga Cabitoonan covered court sa Toledo City ug giila sab sa ngalan Dolino Sports Plaza.

Misalmot ang tanang mga barangay kapitan nga naglangkub sa lungsod sa Aloguinsan, Asturias, Balamban, Barili, Pinamungajan ug Tuburan ug sa Toledo City, nagkahiusa aron pagsalmot sa nahisgotang torneyo ug gikalipay kaayo og dako ni Kong. Garcia ang pagpatim-aw sa mga kapitan bisan pa sa kaapike sa panahon sa iyang pagdapit.
Matud pa ni Kong. Garcia nga ang tumong ug katuyoan sa maong torneyo mao ang paghugoy-hugoy sa mga kapitan isip team building ug aron sab pagbaton og sportsmanship ug physical fitness tali kanila.

Luyo sa pagpahigayon sa torneyo alang sa mga kapitan, giangkon sab hinuon ni Kong. Garcia nga andam siyang magpapili og sab sa umaabot nga 2010 national elections ug iyang gipasalamatan ang tanang mayor, bise mayor, konsehales ug mga kapitan sa pagsuporta sa iyang proyekto.

Pipila sa mga opisyales nga mitambong atol sa opening ceremony kaniadtong Sabado didto sa barangay Cabitoonan, Toledo City mao sila si Aloguinsan vice-mayor Augustus Caesar “Chonse” Moreno, Asturias vice-mayor Joel Dumdum, Balamban Mayor Alex Binghay, Barili Mayor Teresito “Undo” Mariñas, Pinamungajan Mayor Geraldine Yapha ug Konsehal Jeffrey Yapha, Toledo City vice-mayor Rudy Espinosa ug Tuburan Mayor Boyet Suizo.

Gisugdan ang programa pinaagi sa usa ka parada sa tanang teams uban ang ilang mga musa palibot sa utlanan sa barangay Cabitoonan ubos sa paggiya sa Asturias drum and bugle corps ug dayon misunod ang ribbon cutting ceremony sa ganghaan sa covered court ingon man usab ang pagtukas sa tabil sa gym marker.

Si Kong. Garcia giabangan sa mga mayor, bise mayor ug mga kapitan ug ingon man sa mga tigpasiugda sa torneyo nga sila si Glenn Baricuatro ug Department of Public Works and Highways (DPWH) 3rd Engineering District chief Engr. James Dellosa.

Sa wala pa sugdi ang duwa, ang 19 anyos nga si Miss Gladys Villacarlos, ang Sangguniang Kabataan (SK) councilor sa barangay Pooc, Toledo City maoy napiling best muse ug gipaila ang mga musa ni Poblacion, Barili barangay konsehal Joseph Tubilan.

Ang best muse nakadawat ug P5 mil nga ganting cash samtang ang second placer nga si Katrina Moralde sa Balamban nakadawat og P3 mil ug ang third placer Jessa Colina sa Tuburan nakadawat og P2 mil ug ang laing upat ka musa may consolition prize nga usa ka libo ka pesos matag usa.

Atol sa iyang pakigpulong, si Kong. Garcia mibutyag nga ang mahimong kampiyon sa maong torneyo makadawat og ganting cash nga nagkantidad og P100 ka libo, ang second placer P70 ka libo ug ang third P50 ka libo ug ang dili makadaug aduna say mabitbit nga tag P30 ka libo.

Misamot kaalegre sulod sa Cabitoonan covered court dihang mipasundayang ang mga inilang stand-up comedian nga sila si Moojack sa Zerkoh ug Clowns ug ang sexy comedianne nga si Celina Sevilla kinsa maoy nag-awit sa kantang nag-ulohan “Niluluk Ko ang Lahat”.

Ang barangay kapitan sa Cabitoonan mao si Atty. Leo Dolino kinsang pamilya maoy mihatag sa bakanteng luna diin nagbarug karon ang covered court nga gigastoan og singko milyones ka pesos.

Ang nagsangka sa opening mao ang team sa Aloguinsan batok sa Asturias apan ang resulta wala pa hisayri ning pagsuwat kagahapon sa hapon ingon man usab ang mga hulagway sa mga musa. - Gabby G. Malagar (BANAT NEWS)