Niños na-unhan sa Meteors

CEBU, Philippines - Gidominar sa top seed ug host Misamis Oriental Meteors ang  kinatibuk-ang duwa aron paglansang og 70-64 nga kadaugan batok sa defending National Champion M. Lhuillier Kwarta Padala-Cebu Niños sa Game-1 sa ilang “best-of-five” 2009 Smart Liga Pilipinas Conference II National Finals niadtong Martes didto sa Xavier University Gym sa Cagayan de Oro City.

Ang Meteors ni Gov. Oscar Moreno ug coach Jun Noel miposte og 12 puntos nga bentaha paghuman sa unang 10 minutos sa duwa, 20-8 ug ila pa kining giinat ngadto sa 20 puntos, 42-22 sa sayong bahin sa ikatulong kuwarter human masulod ang tira ni Mark Moreno.

Hinuon, ang Cebu Niños mibawos luyo sa mga paningkamot nilang Woodraw Enriquez ug Ariel Mepana aron pagkitkit sa labaw, 44-52 dayon na sa final quarter.

Nakatilaw sa labing unang labaw ang Cebu Niños sa iskor nga 57-56 sa tunga-tungang bahin sa fourth quarter dihang mipakanaog kini og 13-4 luyo sa mga paningkamot nilang Mark Ababon, Stephen Padilla ug Mepana.

Apan ang Meteors alisto sab nga mibawos pinaagi sa 8-1 run aron pag-ilog og balik sa momentum ug gikan niadto wala na makagukod ang bisitang Cebu Niños hangtod nga napupos ang oras sa duwa.

Mao kini ang labing unang higayon nga ang Meteors nidaog sa series opener niini nga conference nga gipaluyohan sa Smart, ML Kwarta Padala, Accel, Air21, Burlington, Pagcor Sports, Laptop Phoneshop Exchange, Nature’s Spring Water ug Molten ubos sa pagtugot sa Samahang Basketbol ng Pilipinas (SBP).

Mao sab kini ang labing unang pilde sa Cebu Niños ni businessman/sportsman Michel Lhuillier ug coach Raul ‘Yayoy’ Alcoseba human nidaog sa ilang unang unom ka duwa sa playoff.

Si Mark Yee, kinsa maoy nag-unang kandidato alang sa MVP race, mao na sab ang nangulo sa Meteors nga mibugha og 19 puntos uban ang siyam ka rebounds, gisundan ni Erian Daja pinaagi sa iyang 12 puntos.

Sila si Dacia ug Mepana mao sab ang nangulo sa pilderong Cebu Niños nga miariya og 15 puntos matag usa.

Ning pagsulat, ang Game-2 padayon pa nga gikumbatihan. Ang Game-3 duwaon karong gabii didto gihapon sa XU Gym.

Kun malugwayan pa ang serye, ang Game-4 ug Game-5 duwaon karong Sabado ug Domingo diha sa Cebu Coliseum.

Puntos Matag Usa

MISAMIS ORIENTAL (70) – Yee 19, Daja 12, Tagupa 10, Moreno 9, Mente 5, Gudez 5, Bombeo 4, Butel 4, Kong 2

CEBU (64) – Dacia 15, Mepana 15, Ababon 11, Tangkay 8, Santos 7, Enriquez 4, Padilla 3, Basco 1. – BANAT NEWS