Penny nangulo sa Tigers batok Aces

CEBU, Philippines - Mibugha og 36 puntos ang import nga si James Penny aron abagan ang Coca Cola Tigers sa pagsakmit sa ikaduha nilang daug batok sa Alaska Aces,89-85, sa nagpadayong aksiyon sa 2009 Motolite-PBA Fiesta Cup kagabii didto sa Araneta Coliseum.Unang nipasulod sa ilang mga tira ang Aces sa pagsugod sa maong duwa dihang ilang gisakmit ang kwatro puntos nga labaw sa first quarter, 21-17, ang sentro nga si Sonny Thoss nihimo og otso sa iyang 12 puntos sa first-half aron pangulohan ang Aces sa ilang atake.

Niabot pa sa 15 puntos ang labaw sa Aces pagbukas sa third period, apan ang Tigers na usab ang mipakita sa ilang bangis nga atake aron papasun ang labaw sa Aces.

Ang 6-foot-6 nga import sa Tigers nga si Penny mimaneobra sa iyang mga puntos sa third quarter aron pangulohan ang rally sa Tigers, gipasulod usab ni Aries Dimaunahan ang iyang three-point shot sa nahibiling dos segundos sa maong kwarter aron inaug ang labaw sa Aces ngadto sa uno punto paingun sa final period.

Gikan didto hingpit nang nakuha sa mga batus ni coach Kenneth Duremdes ang momentum pagtungtung sa fourth period.

Gawas ni Penny, laing midiga og puntos alang sa Tigers si Asi Taulava sa iyang 12 puntos.

Sa ilang bahin, ang import sa Aces nga si Rosell Ellis miposte og 28 puntos alang sa pilderong Aces. Si Willie Miller ug si Thoss midunol usab og 12 puntos matag usa alang sa ilang koponan. - BANAT NEWS