Alang sa mga magbabasa nga mahiligon sa pagdula og bilyar, akong isugyot nga labing maayo nga magbansay mo'g sayo aron layo ang maabot sa inyong billiard career. Ang buot kong ipasabot mao nga mas maayo nga mamanso ninyo ang inyong abilidad sa sayong bahin sa inyong kinabuhi aron mo-matured na ang inyong kait-on samtang magpadayon pagsaka ang inyong pangedaron.
May advantage man gud kun magbansay kamo'g sayo. Sama gud ni Efren 'Bata' Reyes nga sa iyang kabatan-on namanso na sa pagdula og bilyar. Tan-awa, di ba ang lapad niyang kasinatian sa maong disiplina sa sports nagamit niya hangtod karon mao nga nagpabilin siyang epektibo ug competitive sa maong dula? Dili ikalimod nga sa edad niyang 53, ngilngig pa gihapon kaayo'g abilidad si Reyes. Age doesn't matter man gud alang sa usa ka bilyarista nga sakto'g bansay.
Hinuon, dili na kinahanglan nga manundog gyud mo ni Reyes nga nagyampungad kanunay sa bilyaran sa iyang kabanay aron mahanas sa dulang bilyar. Para ninyo, wala kinahanglana nga sa tibuok adlaw atua ra gayod sa bilyaran ang inyong nawong. Ang inyong buhaton mao lang ang paggahin og pipila ka oras alang sa inyong regular practice session. Ang nahabiling mga oras inyo nang gamiton pagbuhat sa lain pa ninyong bulohaton nga may kalabotan sa panginabuhi ug edukasyon.
Ayaw kalimot nga mahinungdanon kaayo ang edukasyon. Paninguha nga ang inyong schedule sa klase dili mo-conflict sa inyong regular practice session. Kinahanglang makakat-on kamo sa saktong time management. Ang billiard career dili man babag sa tinguha pagbaton og edukasyon. Namatud-an kini ni Renemar David. Sa iyang kabatan-on, nahimo niya ang pagdungan sa iyang pag-eskuyla ug pagdula og bilyar. Gani, nahimo siyang garbo sa iyang eskuylahan sa dihang nakaapil siya sa usa ka nasudnong torneyo niadtong tuig 2007.
Mahimo sab ninyo ang gihimo ni David kun kursonada gyud kamo. Dili kinahanglang maapektohan ang inyong pagtuon sa inyong pag-pursue sa inyong billiard career. Magbansay og sayo aron mahayag ang inyong kaugmaon.
* * *
(Mga sugyot ug pakisayod? Text sa 0910-8105522). – BANAT NEWS