Orillaville gilunopan sa Aqua Serve sa FYA 1st Vice Mayor Rama Cup

CEBU, Philippines – Gilunopan sa Aqua Serv Mineral Water ang Orillaville pinaagi sa pag-iskor og 107-102 kadaugan, samtang ang Kuya Allan daling nakabawos dihang ilang gilubong ang Team Grandeur 86-60 niadtong Domingo sa nagpadayong F. Llamas Youth Association (FYA) 1st Vice Mayor Mike Rama Cup didto sa Vicente Sotto Memorial Gym sa barangay Punta Princesa, ning dakbayan.

Ang Aqua Serv, mihakot og 2-0 nga baraha, gipangulohan ni Tito Bacarisas pinaagi sa iyang 37 puntos, gisundan ni Janus Abellana nga adunay 21 ug Christian Villacastin nga mihipos og 18 puntos.

Si Kikoy Maucesa mao usab ang nangulo sa Orillaville nga mibahog og 25 puntos, samtang sila si Mark Enriquez ug Junbel Llegunas mitampo og 19 puntos alang sa Orillaville nga adunay 1-1 nga baraha.

Sa laing duwa, si Ranel Patalita miburak og 30 puntos aron pangulohan ang Kuya Allan ni team owner Allan Guibelondon nga sa kasamtangan   nagbitbit sab og 1-1 nga baraha.

Laing players ang mikulit sab og double figures alang sa Kuya Allan. Si Kenneth Marqueda miposa og 19 puntos, si Eman Ruebal mitunol og 15 puntos ug si Noel Medalle mitampo og 10 puntos.

Si Rovel Tabar miposa og 26 puntos alang sa Grandeur, kinsa nakatilaw sa ilang ikaduhang sunod-sunod nga kapildihan.

Ang FYA tournament gipaluyohan sab ni Punta Princesa barangay captain Rolly Diorico, barangay councilor Ray Gabriel Salgado ug tournament chairman Boy Atillo.

Puntos matag usa

Unang duwa:

Aqua Serv (107) - Bacarisas 37, Abellana 21, Villacastin 18, Garcia 14, Navarro 13, Avila 3

Orillaville (102) - Maucesa 25, Enriquez 19, Llegunas 19, Villaver 16, Casinillo 10, Antiporta 6, Trinidad 6, Brigola 2

Ikaduhang duwa:

Kuya Allan (86) - Patalita 30, Marqueda 19, Ruebal 15, Medalle 10, Canceko 5, Judon 4, Quita 4, Lastimosa 2

Grandeur (80) - Tabar 26, Cadungog 14, Tundag 12, Cacayana 8, Sabalande 7, Atuel 4, Gay 3, Lañojan 2, Pacaña 2 –BANAT NEWS