Sixers 5th seed sa playoffs sa East

CEBU, Philippines - Pormal nga naka-angkon og luna sa playoff ang Philadelphia Sixers human ilang gipukan ang Detroit Pistons kagahapon sa iskor, 95-90 sa nagpadayong aksiyon sa National Basketball Associaiton (NBA) didto sa Wachovia Center sa Philadelphia, Pennsylvania.

Ang Sixers kinsa adunay 40-35 nga baraha, nahimutang karon sa ika-limang luna sa playoffs sa Eastern Conference. Niadto lang Disyembre 12 sa miaging tuig, ang Sixers naghupot og 9-14 nga baraha hinungdan nga gipalagpot sa Sixers ang ilang coach nga si Maurice Cheeks ug gihulipan siya ni Tony DiLeo.

Tam-is alang sa Sixers nga didto gyud nila hingpit makuha ang playoff spot sa ilang home court ug bisan unsay mahitabo sa ilang duwa ugma batok sa New Jersey Nets, dili gihapon kini makahulga sa ilang kampanya.

Duha ka Andre—Iguodala ug Miller maoy nahimong bayani alang sa maong kadaugan sa Sixers. Si Igoudala mihakot og season-high 31 puntos, 16 niini gikan sa second half aron panguluhan ang opensa sa Sixers samtang si Miller mirehistro sa iyang ika-siyam nga triple double sa iyang career dihang mihipos siya’g 21 puntos, 12 ka assists ug 10 ka rebounds.

“We took a gamble playing Andre the whole second half, but we felt we had to do it. Miller had a great game with triple-double and Andre Iguodala had the high score, so those two guys realy steped up,” matud pa ni coach DiLeo sa Sixers.

Sa iyang bahin, si Miller nagkanayon “This game was important. We needed to win. The playoffs clinch is a plus, but we definitely needed this home win before we went on this road trip. That’s why we wanted to stay on the court. We worked hard to get to this points. The hard work is paying off.”

Ang Pistons kinsa mo-host ugmang adlawa batok sa Charlotte Bobcats, aduna nay 36-40 nga baraha ug nagkumpayot sa ikawalong pwesto samtang misaka ang Chicago Bulls ngadto sa ikapitong pwesto.

Sa laing duwa, mihipos og walo ka three-pointers sa fourth period ang Miami Heat aron pagpukan sa Washington Wizards, 118-104.

Didto sa Philips Arena sa Atlanta, Georgia, si Dwight Howard mirehistro na sab ug laing 20-20 nga iskor aron pangulohan ang Orlando Magic sa iyang 21 puntos ug mitabla sa iyang season-high nga 23 ka rebounds aron pagpukan sa Hawks, 88-82.

Sa laing duwa, mipuntos og 34 puntos si J.R. Smith aron pangulohan ang Denver Nuggets ngadto sa 120-104 nga kadaugan batok sa Los Angeles Clippers, midaug ang Toronto Raptors batok New York Knicks, 102-95, midaug ang Memphis Grizzlies batok sa Milwaukee Bucks, 107-102 ug midaug ang Bulls batok sa Nets, 103-94.  - Gabby G. Malagar (BANAT NEWS)