Donaire kumpiyansa sa kanyang laban kay Martinez

MANILA, Philippines - Kumpiyansa si world flyweight champion Nonito “The Filipino Flash” Donaire, Jr. na magagamit niya ang lahat ng kanilang pinagpapawisan sa pag-eensayo laban kay Mexican challenger Raul “Cobra” Martinez.

 Ayon sa 26-anyos na si Donaire, lumagpas na sa 60 rounds ang kanilang ginagawang sparring ng kanyang mga trainers na sina Jonathan at Dodie Boy Peñalosa, mga utol ni world bantamweight titlist Gerry Peñalosa. 

 “Nagtetraining kami nang husto so no fear in my mind, no doubt,” ani Donaire, itataya ang kanyang suot na International Boxing Federation (IBF) at International Boxing Organization (IBO) flyweight belts kontra kay Martinez. “God willing, lahat ng pinag-aralan namin sa training magagamit ko sa fight.”

 Nakatakda ang upakan nina Donaire at Martinez sa Abril 19 sa Araneta Coliseum tampok rin ang paghahamon ni Brian “The Hawaiian Punch” Viloria kay Mexican IBF light flyweight king Ulises “Archie” Solis.

 Ito ang unang pagkakataon na lalaban ang tubong General Santos City sa bansa para sa kanyang ikatlong sunod na pagdedepensa sa titulong kanyang inagaw kay Armenian Vic “The Raging Bull” Darchinyan via fifth-round TKO noong Hulyo 7 ng 2007 sa Connecticut.

 Ibabandera ni Donaire, matagumpay na nakapagdepensa kina Mexican Luis Maldonado at South African Moruti Mthalane, ang 19-0-0 win-loss-draw ring record kasama ang 12 KOs kumpara sa malinis ring 24-0-0 (14 KOs) ni Martinez.

 Kaugnay nito, binalaan naman ni dating Philippine Sports Commission (PSC) chairman Philip Ella Juico si Donaire hinggil sa kakayahan ni Martinez.

 “Undefeated si Martinez although kailangan din nating tingnan kung sino-sino mga tinalo niya,” sabi ni Juico, isang boxing analyst. “Pero para makaabot sa ganitong sitwasyon para labanan si Donaire, kahit paano may sinasabi iyan, dangerous din iyan.”

 Nagmula ang Mexican-American na si Martinez sa isang first-round KO kay Mexican Victor Proa para sa bakanteng North America Boxing Federation (NABF) superflyweight crown.

“Matindi ang training ni Donaire sa grupo ng Peñalosa brothers Jonathan, Dodie Boy and during his free time, World Boxing Organization bantam champ Gerry,” ani Juico. “Matangkad siya, malakas sumuntok at mabilis at maganda ang attitude.” (Russell Cadayona)