Brillo, Sasing mangulo sa RP team

CEBU, Philippines - Paninguhaon sa duha ka Sugbuanong volleyball stars Jusabelle Brillo ug Jonrey Sasing nga makapakita og maayong labok dihang moduwa kini og tulo ka internasyonal nga kompetisyon didto sa Thailand sugod karong adlawa.

Uban nilang Brillo ug Sasing didto sa Thailand mao sila si Nerissa Bautista, Angelo Espiritu, Gabriel Usman, Rhyvyl Verayo, Michelle Carolino ug Johanna Carpio.

Sila si Brillo ug Sasing moduwa sa ilang tagsa-tagsa ka pares atol sa ABC didto sa Bali, Indonesia sa miaging tuig, samtang si Carolino makigtimbang karon ni Carpio ug si Espiritu timbangan ni Usman.

Mo-coach sa RP team mao sila si   Dante Lopez ug Jasper Jimenez.

Ang nasudnong koponan unang mopakita'g aksiyon sa 1st Khanom Asian Beach Volleyball didto sa Nakonstrithamarat.

Human sa Nakonstrithamarat, ang RP team mopakita sa ilang abilidad sa 7th Pathalung-loma Beach Volleyball karong Abril 9-11 didto sa Pathalung ug dayon ang 10th Samila-Federbrau Beach Volley karong Abril 14-16 didto sa Songkhla.

Ang ilang duwa sa Thailand kabahin sa ilang subsob nga pagpangandam alang sa Southeast Asian (SEA) Games didto sa Laos. – BANAT NEWS