Ave Maria Nagsolo sa Group A

CEBU, Philippines - Ang Ave Maria Sanctuary Park nga gilangkuban sa mga kanhi ug umaabot nga varsity players sa University of San Jose-Recoletos nagsolo na karon sa liderato sa Clear Men's Future Basketball League didto sa Sacred Heart-School Jesuit gym.

Ang Ave Maria ni coach Edito Salacut midaog pinaagi sa default batok sa Larios, ang team nga gibitoonan sa mga kanhi sikat nga basketbolista sa University of the Visayas (UV) Green Lancers ug sa University of San Carlos (USC) Warriors.

Gilubong sab sa Ave Maria ang Don Bosco College, 32-19 aron pagposte og 2-0 nga baraha sa Bracket-B.

Sa sayo pa, ang Don Bosco mikulit og 19-13 nga kadaugan batok sa Southwestern University (SWU) Cobras, 19-13, samtang ang Rain nidaog pinaagi sa forfeiture batok gihapon sa Larios, apan napukan ngadto sa Knight-Below Average sa overtime, 32-40.

Sa Bracket-A, ang X-Men nga gipaluyohan sa Ave Maria nagsawo sa liderato uban sa BIR-Our Lady of Fatima sa managsamang 2-0 nga baraha.

Ang X-Men nga gibitoonan nilang Ranulfo Malinao, Bobby Hatague, Armand Ponce, Mannie Gabas, Randy Pogoy ug Jabe Delfino mimakmak sa Watchmen, 38-17 ug miugkat og laing daog batok ACT Quickshoppe. Hinuon, ang ACT Quickshoppe nakabangon gikan sa ilang kapildihan pinaagi sa pagpukan sa Lucky Terminal, 29-19.

Ang BIR-Our Lady of Fatima nga gipangulohan ni kanhi Cebu Institute of Technology (CIT) Wildcat Mark Villagonzalo ug kanhi USC Warrior Mark Ignasius Loyola milansang og 33-30 nga kadaugan batok sa University of Cebu (UC) Webmasters ug gisundan og laing kadaugan batok sa Lucky Terminal, 29-19. – BANAT NEWS