CEBU, Philippines - Makapaukyab nga amateur boxing showdown nga giulohan og "Binumbahay sa Kumo sa Pulpogan" ipahigayon karong adlawa diha sa Lumbang Basketball Court sa barangay Pulpogan sa Consolacion, Cebu.
Tulo ka paresan ang magsangka sa main event ning maong showdown nga gipasiugdahan sa Consolacion Boxing Academy (CBA) uban sa abag sa Rod Maloy Sports Promotions nga gidumala ni Cansaga barangay councilor Rudy 'Rod Maloy' Maloloy-on.
"Lain kining promosyon sa amateur boxing ubos sa pagpakabana sa Consolacion Boxing Academy (CBA) aron padayon sa pagdiskubre niadtong mga batan-on nga adunay abilidad ug talagsaong kusog sa boksing ug mahimong umaabot nga world champions," matud pa ni Rod Maloy.
Magsangka sa main events mao si John Ryan Quimbo sa Compostela kinsa makighilam-osay og kumo batok ni Jocel Gestopa sa Cansaga, Consolacion ubos sa 56 kgs., Jonathan Nopal sa Pulpogan batok ni Junjun Pancho sa Compostela sa timbang nga 55 kgs. ug Jaylord Bangis sa Pulpogan batok ni Berto Ruta sa Compostela ubos sa 45 kgs.
Laing 15 ka away ang masaksihan alang sa supporting bouts ning maong promosyon nga gisuportahan sab ni Pulpogan barangay captain Roy Linaboc uban sa iyang mga konsehales. Gipaluyohan sab kini sa maabtik nga konsehal sa Consolacion nga si Arturo Quimod.
Ang maong showdown nga magsugod sa alas-7 sa gabii libre kini sa tanan. – BANAT NEWS